๑๐. คณเปตวัตถุ

|๑๓๐.๖๙๐| ๑๐ นคฺคา ทุพฺพณฺณรูปาถ กีสา ธมนิสณฺฐิตา อุปฺผาสุลิกา กีสกา เก นุ ตุเมฺหถ มาริสาติ ฯ |๑๓๐.๖๙๑| มยํ ภทนฺเต เปตมฺหา ทุคฺคตา ยมโลกิกา ปาปกมฺมํ กริตฺวาน เปตโลกํ อิโต คตาติ ฯ |๑๓๐.๖๙๒| กึ นุ กาเยน วาจาย มนสา ทุกฺกฏํ กตํ กิสฺส กมฺมวิปาเกน เปตโลกํ อิโต คตาติ ฯ |๑๓๐.๖๙๓| อนวชฺเชสุ ๑- ติตฺเถสุ วิจินิมฺหฑฺฒมาสกํ สนฺเตสุ เทยฺยธมฺเมสุ ทีปํ นากมฺหมตฺตโน ฯ |๑๓๐.๖๙๔| นทึ อุเปม ตสิตา ริตฺตกา ปริวตฺตติ ฉายํ อุเปม อุเณฺหสุ อาตโป ปริวตฺตติ ฯ |๑๓๐.๖๙๕| อคฺคิวณฺโณว โน วาโต ฑหนฺโต อุปวายติ เอตญฺจ ภนฺเต อรหาม อญฺญญฺจ ปาปกํ ตโต ฯ |๑๓๐.๖๙๖| อปิ โยชนานิ คจฺฉาม ฉาตา อาหารคิทฺธิโน @เชิงอรรถ: ๑ อนาวเฏสูติปิ ทิสฺสติ ฯ อลทฺธา เยว นิวตฺตาม อโห โน อปฺปปุญฺญตา ฯ |๑๓๐.๖๙๗| ฉาตา ปมุจฺฉิตา ภนฺเต ภูมิยํ ปฏิสุมฺภิตา อุตฺตานา ปติกิราม อวกุชฺชา ปตามเส ฯ |๑๓๐.๖๙๘| เต จ ตตฺเถว ปติตา ภูมิยํ ปฏิสุมฺภิตา อุรํ สีสญฺจ ฆฏฺเฏม อโห โน อปฺปปุญฺญตา ฯ |๑๓๐.๖๙๙| เอตญฺจ ภนฺเต อรหาม อญฺญญฺจ ปาปกํ ตโต สนฺเตสุ เทยฺยธมฺเมสุ ทีปํ นากมฺหมตฺตโน ฯ |๑๓๐.๗๐๐| เต หิ นูน อิโต คนฺตฺวา โยนึ ลทฺธาน มานุสึ วทญฺญู สีลสมฺปนฺนา กาหาม กุสลํ พหุนฺติ ฯ คณเปตวตฺถุ ทสมํ ฯ