๑๐. อุคคเถรคาถา

๒๑๗. ๑๐. อุคฺคตฺเถรคาถาวณฺณนา

ยํ มยา ปกตํ กมฺมนฺติ อายสฺมโต อุคฺคตฺเถรสฺส คาถา. กา อุปฺปตฺติ?

อยมฺปิ ปุริมพุทฺเธสุ กตาธิกาโร ตตฺถ ตตฺถ ภเว ปุญฺญานิ กโรนฺโต อิโต เอกตึเส กปฺเป สิขิสฺส ภควโต กาเล กุลเคเห นิพฺพตฺติตฺวา วิญฺญุตํ ปตฺโต เอกทิวสํ สิขึ ภควนฺตํ ปสฺสิตฺวา ปสนฺนมานโส เกตกปุปฺเผหิ ปูชํ อกาสิ. โส เตน ปุญฺญกมฺเมน เทวโลเก นิพฺพตฺติตฺวา อปราปรํ สุคตีสุเยว สํสรนฺโต อิมสฺมึ พุทฺธุปฺปาเท โกสลรฏฺเฐ อุคฺคนิคเม เสฏฺฐิปุตฺโต หุตฺวา นิพฺพตฺติ, อุคฺโคเตฺววสฺส นามํ อโหสิ. โส วิญฺญุตํ ปตฺโต ภควติ ตสฺมึ นิคเม ภทฺทาราเม วิหรนฺเต วิหารํ คนฺตฺวา สตฺถุ สนฺติเก ธมฺมํ สุตฺวา ปฏิลทฺธสทฺโธ ปพฺพชิตฺวา วิปสฺสนาย กมฺมํ กโรนฺโต น จิรสฺเสว อรหตฺตํ ปาปุณิ. เตน วุตฺตํ อปทาเน ๓- :-

"วินตานทิยา ตีเร ๔- ปิลกฺขุ ๕- ผลิโต อหุ

@เชิงอรรถ: ๑ อภิ.สงฺ. ๓๔/๑๐๖๗/๒๕๒ นิกฺเขปกณฺฑ, อภิ.วิ. ๓๕/๙๑๔/๔๔๖๕ ขุทฺทกวตฺถุวิภงฺค

@๒ สี. อฏฺฐวิภาโค ๓ ขุ.อป. ๓๒/๑๐/๒๒๕ สุทสฺสนตฺเถราปทาน

@๔ ปาลิ. วิตฺถตาย นทิยา ตีเร ๕ สี. ปิลกฺโข

ตาหํ รุกฺขํ คเวสนฺโต อทฺทสํ โลกนายกํ.

เกตกํ ปุปฺผิตํ ทิสฺวา วณฺเฏ เฉตฺวานหํ ตทา

พุทฺธสฺส อภิโรเปสึ สิขิโน โลกพนฺธุโน.

เยน ญาเณน ปตฺโตสิ อจฺจุตํ อมตํ ปทํ

ตํ ญาณํ อภิปูเชมิ พุทฺธเสฏฺฐ มหามุนิ.

ญาณมฺหิ ปูชํ กตฺวาน ปิลกฺขุํ อทฺทสํ อหํ

ปฏิลทฺโธมฺหิ ตํ ปญฺญํ ๑- ญาณปูชายิทํ ผลํ.

เอกตึเส อิโต กปฺเป ยํ ปุปฺผมภิโรปยึ

ทุคฺคตึ นาภิชานามิ ญาณปูชายิทํ ผลํ.

อิโต เตรสกปฺปมฺหิ ทฺวาทสาสุํ ผลุคฺคตา

สตฺตรตนสมฺปนฺนา จกฺกวตฺตี มหพฺพลา.

กิเลสา ฌาปิตา มยฺหํ ฯเปฯ กตํ พุทฺธสฺส สาสนนฺ"ติ.

อรหตฺตํ ปน ปตฺวา อตฺตโน วฏฺฏูปจฺเฉท ๒- ทีปเนน อญฺญํ พฺยากโรนฺโต:-

"ยํ มยา ปกตํ กมฺมํ อปฺปํ วา ยทิ วา พหุํ

สพฺพเมตํ ปริกฺขีณํ นตฺถิ ทานิ ปุนพฺภโว"ติ คาถํ อภาสิ.

ตตฺถ ยํ มยา ปกตํ กมฺมนฺติ ยํ กมฺมํ ตีหิ กมฺมทฺวาเรหิ ฉหิ อุปฺปตฺติ- ทฺวาเรหิ อฏฺฐหิ อสํวรทฺวาเรหิ ๓- ปาปาทิวเสน ทานาทิวเสน จาติ อเนเกหิ ปกาเรหิ อนาทิมติ สํสาเร ยํ มยา กตํ อุปจิตํ อภินิพฺพตฺติตํ วิปากกมฺมํ. อปฺปํ วา ยทิ วา พหุนฺติ ตญฺจ วตฺถุเจตนาปโยคกิเลสาทีนํ ทุพฺพลภาเวน อปฺปํ วา, เตสํ

@เชิงอรรถ: ๑ ก. สญฺญํ ๒ สี. วฏฺฏจฺเฉท.... ๓ ม. สํวรทฺวาราทีหิ, สี. อฏฺฐหิ อสํวเรหิ,

@ ฉ.ม. อฏฺฐหิ อสํวรทฺวาเรหิ อฏฺฐหิ จ สํวรทฺวาเรหิ พลวภาเวน อภิณฺหปวตฺติยา จ พหุํ วา. สพฺพเมตํ ปริกฺขีณนฺติ สพฺพเมว เจตํ กมฺมํ กมฺมกฺขยกรสฺส อคฺคมคฺคสฺส อธิคตตฺตา ปริกฺขยํ คตํ, กิเลสวฏฺฏปฺปหาเนน หิ กมฺมวฏฺฏํ ปหีนเมว โหติ วิปากวฏฺฏสฺส อนุปฺปาทนโต. เตนาห "นตฺถิ ทานิ ปุนพฺภโว"ติ. อายตึ ปุนพฺภวาภินิพฺพตฺติ มยฺหํ นตฺถีติ อตฺโถ. "สพฺพมฺเปตนฺ"ติปิ ๑- ปาโฐ, สพฺพมฺปิ เอตนฺติ ๒- ปทวิภาโค.

อุคฺคตฺเถรคาถาวณฺณนา นิฏฺฐิตา.

ปรมตฺถทีปนิยา เถรคาถาสํวณฺณนาย

อฏฺฐมวคฺควณฺณนา นิฏฺฐิตา.

@เชิงอรรถ: ๑ สี. สพฺพเมเอตนฺติปิ ๒ สี. สพฺพเมว เอตนฺติ