๓. ปุณณาเถรีคาถา

๔๐๔. ๓. ปุณฺณาเถรีคาถาวณฺณนา

ปุณฺเณ ปูรสฺสุ ธมฺเมหีติอาทิกา ๒- ปุณฺณาย นาม สิกฺขมานาย คาถา.

อยมฺปิ ปุริมพุทฺเธสุ กตาธิการา ตตฺถ ตตฺถ ภเว วิวฏฺฏูปนิสฺสยํ กุสลํ อุปจินนฺตี พุทฺธสุญฺเญ โลเก จนฺทภาคาย นทิยา ตีเร กินฺนรโยนิยํ นิพฺพตฺตา เอกทิวสํ ตตฺถ อญฺญตรํ ปจฺเจกพุทฺธํ ทิสฺวา ปสนฺนมานสา นฬมาลาย ตํ ปูเชตฺวา อญฺชลึ ปคฺคยฺห อฏฺฐาสิ. สา เตน ปุญฺญกมฺเมน สุคตีสุเยว สํสรนฺตี อิมสฺมึ พุทฺธุปฺปาเท สาวตฺถิยํ คหปติมหาสาลกุเล นิพฺพตฺติ, ปุณฺณาติสฺสา นามํ อโหสิ. สา อุปนิสฺสยสมฺปนฺนตาย วีสติวสฺสานิ วสมานา มหาปชาปติโคตมิยา สนฺติเก ธมฺมํ สุตฺวา ปฏิลทฺธสทฺธา ปพฺพชิตฺวา สิกฺขมานา เอว หุตฺวา วิปสฺสนํ อารภิ. สตฺถา ตสฺสา คนฺธกุฏิยํ นิสินฺโน เอว โอภาสํ วิสฺสชฺเชตฺวา:-

"ปุณฺเณ ปูรสฺสุ ธมฺเมหิ จนฺโท ปณฺณรเสริว

ปริปุณฺณาย ปญฺญาย ตโมกฺขนฺธํ ปทาลยา"ติ อิมํ คาถมาห.

@เชิงอรรถ: ๑ ม. อชฺฌภาสีติ ๒ ฉ.ม. อาทิกาติ ปาโฐ น ทิสฺสติ. เอวมุปริปิ

ตตฺถ ปุณฺเณติ ตสฺสา อาลปนํ. ปูรสฺสุ ธมฺเมหีติ สตฺตตึสโพธิปกฺขิยธมฺเมหิ ปริปุณฺณา โหหิ. จนฺโท ปณฺณรเสริวาติ รกาโร ปทสนฺธิกโร. ปณฺณรเส ปุณฺณมาสิยํ สพฺพาหิ กลาหิ ปริปุณฺโณ จนฺโท วิย. ปริปุณฺณาย ปญฺญายาติ โสฬสนฺนํ กิจฺจานํ ปาริปูริยา ปริปุณฺณาย อรหตฺตมคฺคปญฺญาย. ตโมกฺขนฺธํ ปทาลยาติ โมหกฺขนฺธํ อนวเสสโต ภินฺท สมุจฺฉินฺท, โมหกฺขนฺธปทาลเนน สเหว สพฺเพปิ กิเลสา ปทาลิตา โหนฺตีติ.

สา ตํ คาถํ สุตฺวา วิปสฺสนํ วฑฺเฒตฺวา อรหตฺตํ ปาปุณิ. เตน วุตฺตํ อปทาเน ๑-:-

"จนฺทภาคานทีตีเร อโหสึ กินฺนรี ตทา

อทฺทสํ วิรชํ พุทฺธํ สยมฺภุํ อปราชิตํ.

ปสนฺนจิตฺตา สุมนา เวทชาตา กตญฺชลี

นฬมาลํ คเหตฺวาน สยมฺภุํ อภิปูชยึ.

เตน กมฺเมน สุกเตน เจตนาปณิธีหิ จ

ชหิตฺวา กินฺนรีเทหํ อคจฺฉึ ติทสํ คณํ. ๒-

ฉตฺตึสเทวราชูนํ มเหสิตฺตมการยึ

ทสนฺนํ จกฺกวตฺตีนํ มเหสิตฺตมการยึ.

เวทยิตฺวาน กุสลํ ๓- ปพฺพชึ อนคาริยํ

กิเลสา ฌาปิตา มยฺหํ ภวา สพฺเพ สมูหตา.

สพฺพาสวา ปริกฺขีณา นตฺถิ ทานิ ปุนพฺภโว

จตุนฺนวุติโต กปฺเป ยํ ปุปฺผมภิปูชยึ.

@เชิงอรรถ: ๑ ขุ.อป. ๓๓/๓๗/๒๘๖ ๒ ฉ.ม. คตึ ๓ ฉ.ม. สํเวเชตฺวาน เม จิตฺตํ

ทุคฺคตึ นาภิชานามิ พุทฺธปูชายิทํ ๑- ผลํ

กิเลสา ฌาปิตา มยฺหํ ฯเปฯ กตํ พุทฺธสฺส สาสนนฺ"ติ.

อรหตฺตํ ปน ปตฺตา สา เถรี ตเมว คาถํ อุทาเนสิ. อยเมว จสฺสา อญฺญาพฺยากรณคาถา อโหสีติ.

ปุณฺณาเถรีคาถาวณฺณนา นิฏฺฐิตา.