๑๗. ธรรมาเถรีคาถา

418. 17. Dhammātherīgāthāvaṇṇanā

piṇḍapātaṃ caritvānātiādikā dhammāya theriyā gāthā.

Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinitvā sambhatapuññasambhārā imasmiṃ buddhuppāde sāvatthiyaṃ kulaghare nibbattitvā vayappattā paṭirūpasāmikassa gehaṃ gantvā 1- satthu sāsane paṭiladdhasaddhā pabbajitukāmā hutvā sāmikena ananuññātā pacchā sāmike kālakate pabbajitvā vipassanāya kammaṃ karontī ekadivasaṃ bhikkhāya caritvā vihāraṃ āgacchantī paripatitvā tameva ārammaṇaṃ katvā vipassanaṃ vaḍḍhetvā saha paṭisambhidāhi arahattaṃ patvā:-

"piṇḍapātaṃ caritvāna daṇḍamādāya 2- dubbalā

vedhamānehi gattehi tattheva nipatiṃ chamā

disvā ādīnavaṃ kāye atha cittaṃ vimucci me"ti udānavasena imaṃ gāthaṃ abhāsi.

Tattha piṇḍapātaṃ caritvāna, daṇḍamādāya dubbalāti piṇḍapātatthāya yaṭṭhiṃ upatthambhena nagare caritvā bhikkhāya āhiṇḍetvā. Chamāti chamāyaṃ bhūmiyaṃ, pādānaṃ avasena 3- bhūmiyaṃ nipatinti attho. Disvā ādīnavaṃ kāyeti asubhānicca- dukkhānattādīhi nānappakārehi sarīre dosaṃ paññācakkhunā disvā. Atha cittaṃ vimucci meti ādīnavānupassanāya parato pavattehi nibbidānupassanādīhi vikkhambhanavasena mama cittaṃ kilesehi vimuccitvā puna maggaphalehi yathākkamaṃ samucchedavasena ceva paṭipassaddhivasena ca sabbaso vimucci vimuttaṃ, na dānissā vimocetabbaṃ atthīti. Idameva cassā aññābyākaraṇaṃ ahosīti.

Dhammātherīgāthāvaṇṇanā niṭṭhitā.

@Footnote: 1 Sī. gatā 2 cha.Ma.,i. daṇḍamolubbha 3 Ma. avahanena