๒. ชันตาเถรีคาถา

๔๒๑. ๒. เชนฺตาเถรีคาถาวณฺณนา

เย อิเม สตฺต โพชฺฌงฺคาติอาทิกา เชนฺตาย เถริยา คาถา.

ตสฺสา อตีตํ ปจฺจุปฺปนฺนญฺจ วตฺถุ อภิรูปนนฺทาวตฺถุสทิสํ. อยมฺปน เวสาลิยํ ลิจฺฉวิราชกุเล นิพฺพตฺติ อยํ ๑- วิเสโส. สตฺถารา เทสิตํ ธมฺมํ สุตฺวา เทสนาวสาเน อรหตฺตํ ปตฺวา อตฺตนา อธิคตํ วิเสสํ ปจฺจเวกฺขิตฺวา ปิติวเสน:-

@เชิงอรรถ: ๑ ฉ.ม. นิพฺพตฺตีติ อยเมว

"เย อิเม สตฺต โพชฺฌงฺคา มคฺคา นิพฺพานปตฺติยา

ภาวิตา เต มยา สพฺเพ ยถา พุทฺเธน เทสิตา.

ทิฏฺโฐ หิ เม โส ภควา อนฺติโมยํ สมุสฺสโย

วิกฺขีโณ ชาติสํสาโร นตฺถิ ทานิ ปุนพฺภโว"ติ อิมา เทฺว คาถา อภาสิ.

ตตฺถ เย อิเม สตฺต โพชฺฌงฺคาติ เย อิเม สติธมฺมวิจยวีริยปิติปสฺสทฺธิสมาธิ- อุเปกฺขาสงฺขาตา โพธิยา ยถาวุตฺตาย ธมฺมสามคฺคิยา, โพธิสฺส วา พุชฺฌนกสฺส ตํสมงฺคิโน ปุคฺคลสฺส องฺคภูตตฺตา "โพชฺฌงฺคา"ติ ลทฺธนามา สตฺต ธมฺมา. มคฺคา นิพฺพานปตฺติยาติ นิพฺพานาธิคมสฺส อุปายภูตา. ภาวิตา เต มยา สพฺเพ, ยถา พุทฺเธน เทสิตาติ เต สตฺตตึสโพธิปกฺขิยธมฺมา สพฺเพปิ มยา ยถา พุทฺเธน ภควตา เทสิตา, ตถา มยา ๑- อุปฺปาทิตา จ วฑฺฒิตา จ.

ทิฏฺโฐ หิ เม โส ภควาติ หิสทฺโท เหตุอตฺโถ. ยสฺมา โส ภควา ธมฺม- กาโย สมฺมาสมฺพุทฺโธ อตฺตนา ว อธิคตอริยธมฺมทสฺสเนน ทิฏฺโฐ, ตสฺมา อนฺติโมยํ สมุสฺสโยติ โยชนา. อริยธมฺมทสฺสเนน หิ พุทฺธา ภควนฺโต อญฺเญ จ อริยา ทิฏฺฐา นาม โหนฺติ, น รูปกายทสฺสนมตฺเตน. ยถาห "โย โข วกฺกลิ ธมฺมํ ปสฺสติ, โส มํ ปสฺสตี"ติ ๒- จ "สุตวา จ โข ภิกฺขเว อริยสาวโก อริยานํ ทสฺสาวี"ติ ๓- จ อาทิ. เสสํ วุตฺตนยเมว.

เชนฺตาเถรีคาถาวณฺณนา นิฏฺฐิตา.

@เชิงอรรถ: ๑ ม.,อิ. อตฺตโน ๒ สํ.ข. ๑๗/๘๗/๙๖ ๓ ม.มู. ๑๒/๒๐/๑๒, สํ.ข. ๑๗/๑/๓