๒. ชันตาเถรีคาถา

421. 2. Jentātherīgāthāvaṇṇanā

ye ime satta bojjhaṅgātiādikā jentāya theriyā gāthā.

Tassā atītaṃ paccuppannañca vatthu abhirūpanandāvatthusadisaṃ. Ayampana vesāliyaṃ licchavirājakule nibbatti ayaṃ 1- viseso. Satthārā desitaṃ dhammaṃ sutvā desanāvasāne arahattaṃ patvā attanā adhigataṃ visesaṃ paccavekkhitvā pitivasena:-

@Footnote: 1 cha.Ma. nibbattīti ayameva

"ye ime satta bojjhaṅgā maggā nibbānapattiyā

bhāvitā te mayā sabbe yathā buddhena desitā.

Diṭṭho hi me so bhagavā antimoyaṃ samussayo

vikkhīṇo jātisaṃsāro natthi dāni punabbhavo"ti imā dve gāthā abhāsi.

Tattha ye ime satta bojjhaṅgāti ye ime satidhammavicayavīriyapitipassaddhisamādhi- upekkhāsaṅkhātā bodhiyā yathāvuttāya dhammasāmaggiyā, bodhissa vā bujjhanakassa taṃsamaṅgino puggalassa aṅgabhūtattā "bojjhaṅgā"ti laddhanāmā satta dhammā. Maggā nibbānapattiyāti nibbānādhigamassa upāyabhūtā. Bhāvitā te mayā sabbe, yathā buddhena desitāti te sattatiṃsabodhipakkhiyadhammā sabbepi mayā yathā buddhena bhagavatā desitā, tathā mayā 1- uppāditā ca vaḍḍhitā ca.

Diṭṭho hi me so bhagavāti hisaddo hetuattho. Yasmā so bhagavā dhamma- kāyo sammāsambuddho attanā va adhigataariyadhammadassanena diṭṭho, tasmā antimoyaṃ samussayoti yojanā. Ariyadhammadassanena hi buddhā bhagavanto aññe ca ariyā diṭṭhā nāma honti, na rūpakāyadassanamattena. Yathāha "yo kho vakkali dhammaṃ passati, so maṃ passatī"ti 2- ca "sutavā ca kho bhikkhave ariyasāvako ariyānaṃ dassāvī"ti 3- ca ādi. Sesaṃ vuttanayameva.

Jentātherīgāthāvaṇṇanā niṭṭhitā.

@Footnote: 1 Ma.,i. attano 2 saṃ.kha. 17/87/96 3 Ma.mū. 12/20/12, saṃ.kha. 17/1/3