๙. อกาลราวิชาดก

9 Akālarāvijātakaṃ

amātāpitusaṃvaḍḍhoti idaṃ satthā jetavane viharanto ekaṃ akālarāviṃ bhikkhuṃ ārabbha kathesi.

So kira sāvatthīvāsikulaputto sāsane pabbajitvā vattaṃ vā sikkhaṃ vā na uggaṇhi. So imasmiṃ kāle mayā vattaṃ kātabbaṃ imasmiṃ kāle upaṭṭhātabbaṃ imasmiṃ kāle uggahetabbaṃ imasmiṃ kāle sajjhāyitabbanti na jānāti paṭhamayāmepi majjhimayāmepi pacchimayāmepi pabuddhakkhaṇeyeva mahāsaddaṃ karoti. Bhikkhū niddaṃ na labhanti. Dhammasabhāyaṃ bhikkhū āvuso asukabhikkhu evarūpe ratanasāsane pabbajitvā vattaṃ vā sikkhaṃ vā kālaṃ vā akālaṃ na jānātīti tassa aguṇaṃ kathesuṃ. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idānevesa akālarāvī pubbepi akālarāvīyeva kālākālaṃ ajānanabhāvena ca gīvāya valitāya jīvitakkhayaṃ pattoti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto Udiccabrāhmaṇakule nibbattitvā vayappatto sabbasippe pāraṃ gantvā bārāṇasiyaṃ disāpāmokkho ācariyo hutvā pañcasate māṇave sippaṃ vācesi. Tesaṃ māṇavānaṃ eko kālarāvī kukkuṭo atthi. Te tassa vassitasaddena uṭṭhāya sippaṃ sikkhanti. So kālamakāsi. Te aññaṃ kukkuṭaṃ pariyesantā caranti. Atheko māṇavako susānavane dārūni uddharanto ekaṃ kukkuṭaṃ disvā ānetvā pañjare ṭhapetvā paṭijaggati. So susāne vaḍḍhitattā asukavelāya vassitabbanti ajānanto kadāci atirattiṃ vassati kadāci aruṇuggamane. Māṇavā tassa atirattiṃ vassitakāle sippaṃ sikkhantā yāva aruṇuggamanā sikkhituṃ asakkontā niddāyamānā gahitaṭṭhānaṃpi na passanti atippabhāte vassitakāle sajjhāyassa okāsameva na labhanti. Māṇavā atirattiṃ vā vassati atippabhāte vā imaṃ nissāya amhākaṃ sippaṃ na niṭṭhāyissatīti taṃ gahetvā gīvaṃ vaṭṭetvā jīvitakkhayaṃ pāpetvā akālarāvī kukkuṭo amhehi ghātitoti ācariyassa kathesuṃ. Ācariyo ovādaṃ agahetvā saṃvaḍḍhitabhāvena maraṇaṃ pattoti vatvā imaṃ gāthamāha

amātāpitusaṃvaḍḍho anācariyakule vasaṃ

nāyaṃ kālamakālaṃ vā abhijānāti kukkuṭoti.

Tattha amātāpitusaṃvaḍḍhoti mātāpitaro nissāya tesaṃ ovādaṃ agahetvā saṃvaḍḍho. Anācariyakule vasanti ācariyakulepi avasamāno ācariyasikkhāpakaṃ kañci nissāya vasitattāti attho. Kālamakālaṃ Vāti imasmiṃ kāle vassitabbaṃ imasmiṃ kāle na vassitabbanti evaṃ vassitabbayuttakaṃ kālaṃ akālaṃ vā esa kukkuṭo na jānāti ajānanabhāveneva jīvitakkhayaṃ pattoti .

Idaṃ kāraṇaṃ dassetvā bodhisatto yāvatāyukaṃ ṭhatvā yathākammaṃ gato.

Satthā imaṃ dhammadesanaṃ āharitvā jātakaṃ samodhānesi tadā akālarāvī kukkuṭo ayaṃ bhikkhu ahosi antevāsikā buddhaparisā ācariyo pana ahamevāti.

Akālarāvijātakaṃ navamaṃ.