๙. อัคคิกชาดก

9 Aggikajātakaṃ

nāyaṃ sikhā puññahetūti idaṃ satthā jetavane viharanto kuhakaññeva bhikkhuṃ ārabbha kathesi. Paccuppannavatthu heṭṭhāvuttasadisaṃ.

Atītasmiñhi bārāṇasiyaṃ brahmadatte rajjaṃ kārente bodhisatto mūsikarājā hutvā araññe vasati. Atheko sigālo vanaḍāhe uṭṭhite palāyituṃ asakkonto ekasmiṃ rukkhe sīsaṃ āhacca aṭṭhāsi. Tassa sakalasarīre lomāni jhāyiṃsu. Rukkhaṃ āhacca ṭhitaṭṭhāne pana matthake cūḷā viya thokāni lomāni aṭṭhaṃsu. So ekadivasaṃ soṇḍiyaṃ pānīyaṃ pivanto chāyaṃ olokento cūḷaṃ disvā uppannaṃdāni me bhaṇḍamūlanti araññe viharanto taṃ mūsikādariṃ disvā imā mūsikā vañcetvā khādissāmīti heṭṭhā vuttanayeneva avidūre Aṭṭhāsi. Atha naṃ bodhisatto gocarāya caranto disvā sīlavā ayanti saññāya upasaṅkamitvā tvaṃ kinnāmosīti pucchi. Ahaṃ aggikabhāradvājo nāmāti. Atha kasmā āgatosīti. Tumhākaṃ rakkhanatthāyāti. Kinti katvā amhe rakkhissasīti. Ahaṃ naṅguṭṭhagaṇanannāma jānāmi tumhākaṃ pāto nikkhamitvā gocarāya gamanakāle ettakāti gaṇetvā paccāgamanakālepi gaṇessāmi evaṃ sāyaṃ pātaṃ gaṇento rakkhissāmīti. Tenahi rakkha mātulāti. So sādhūti sampaṭicchitvā nikkhamanakāle eko dve tayoti gaṇetvā paccāgamanakālepi tatheva gaṇetvā sabbapacchimaṃ gahetvā khādati. Sesaṃ purimasadisameva. Idha pana mūsikarājā nivattitvā ṭhito bho aggikabhāradvāja nāyaṃ tava dhammasudhammatāya matthake cūḷā ṭhapitā kucchikāraṇā pana ṭhapitāti vatvā imaṃ gāthamāha

nāyaṃ sikhā puññahetu ghāsahetu ayaṃ sikhā

naṅguṭṭhagaṇanaṃ yāti alante hotu aggikāti.

Tattha naṅguṭṭhagaṇanaṃ yātīti aṅguṭṭhagaṇanā vuccati. Ayaṃ mūsikagaṇo aṅguṭṭhagaṇanaṃ na gacchati na upeti na pūrati parikkhayaṃ gacchatīti attho. Alante hotu aggikāti sigālaṃ nāmena ālapanto āha. Ettāvatā te alaṃ hotu na ito paraṃ mūsikā khādissasi amhehi vā tayā vā saddhiṃ saṃvāso alaṃ hotu na mayaṃ idāni tayā saddhiṃ vasissāmātipi attho. Sesaṃ purimasadisamevāti.

Satthā imaṃ dhammadesanaṃ āharitvā jātakaṃ samodhānesi tadā sigālo ayaṃ bhikkhu ahosi mūsikarājā pana ahamevāti.

Aggikajātakaṃ navamaṃ.

------