๔. นังคุฏฐชาดก

๔. นงฺคุฏฺฐชาตกํ

พหุมฺเปตํ อสพฺภิ ชาตเวทาติ อิทํ สตฺถา เชตวเน วิหรนฺโต อาชีวกานํ มิจฺฉาตปํ อารพฺภ กเถสิ ฯ

ตทา กิร อาชีวกา เชตวนปิฏฺฐิยํ นานปฺปการํ มิจฺฉาตปํ จรนฺติ ฯ สมฺพหุลา ภิกฺขู เตสํ ตํ อุกฺกุฏิกปฺปธานวคฺคุลิวตฺต- กณฺฏกาปสฺสยปญฺจตปนาทิเภทมิจฺฉาตปํ ทิสฺวา ภควนฺตํ ปุจฺฉึสุ อตฺถิ นุ โข ภนฺเต อิมํ มิจฺฉาตปํ นิสฺสาย กุสลํ วา วุฑฺฒิ วาติ ฯ สตฺถา น ภิกฺขเว เอวรูปํ มิจฺฉาตปํ นิสฺสาย กุสลํ วา วุฑฺฒิ วา อตฺถิ ปุพฺเพ ปณฺฑิตา เอวรูปํ ตปํ นิสฺสาย กุสลํ วา วุฑฺฒิ วา ภวิสฺสตีติ สญฺญาย ชาตคฺคึ คเหตฺวา อรญฺญํ ปวิสิตฺวา อคฺคิชุหนาทิวเสน กิญฺจิ วุฑฒึ อปสฺสนฺโต อคฺคึ อุทเกน นิพฺพาเปตฺวา กสิณปริกมฺมํ กตฺวา อภิญฺญา จ สมาปตฺติโย จ นิพฺพตฺเตตฺวา พฺรหฺมโลกปรายนา อเหสุนฺติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต อุทิจฺจพฺราหฺมณกุเล นิพฺพตฺติ ฯ ตสฺส ชาตทิวเส มาตาปิตโร ชาตคฺคึ คเหตฺวา ฐเปสุํ ฯ อถ นํ โสฬสวสฺสิกกาเล เอตทโวจุํ มยํ เต ปุตฺต ชาตทิวเส อคฺคึ คณฺหิมฺห สเจ อคารํ อชฺฌาวสิตุกาโม ตโย เวเท อุคฺคณฺห อถ พฺรหฺมโลกํ คนฺตุกาโม อคฺคึ คเหตฺวา อรญฺญํ ปวิสิตฺวา อคฺคึ ปริจรนฺโต มหาพฺรหฺมานํ อาราเธตฺวา พฺรหฺมโลกปรายโน โหหีติ ฯ โส น มยฺหํ อคาเรน อตฺโถติ อคฺคึ คเหตฺวา อรญฺญํ ปวิสิตฺวา อสฺสมปทํ มาเปตฺวา อคฺคึ ปริจรนฺโต อรญฺเญ วิหาสิ ฯ โส เอกทิวสํ ปจฺจนฺตคามเก โคทกฺขิณํ ลภิตฺวา ตํ โคณํ อสฺสมปทํ เนตฺวา จินฺเตสิ อคฺคึ ภควนฺตํ โคมํสํ ขาทาเปสฺสามีติ ฯ อถสฺส เอตทโหสิ อิธ โลณํ นตฺถิ อคฺคิ ภควา อโลณํ ขาทิตุํ น สกฺขิสฺสติ คามโต โลณํ อาหริตฺวา อคฺคึ ภควนฺตํ สโลณกํ ขาทาเปสฺสามีติ ฯ โส ตํ ตตฺเถว พนฺธิตฺวา โลณตฺถาย คามกํ อคมาสิ ฯ ตสฺมึ คเต สมฺพหุลา ลุทฺทกา ตํ ฐานํ อาคตา โคณํ ทิสฺวา วธิตฺวา มํสํ ปจิตฺวา ขาทิตฺวา นงฺคุฏฺฐญฺจ ชงฺฆญฺจ จมฺมญฺจ ตตฺเถว ฉฑฺเฑตฺวา อวเสสมํสมาทาย อคมํสุ ฯ พฺราหฺมโณ อาคนฺตฺวา นงฺคุฏฺฐาทิมตฺตํ ทิสฺวา จินฺเตสิ อยํ อคฺคิ ภควา อตฺตโนปิ สนฺตกํ รกฺขิตุํ น สกฺโกติ มํ ปน กทา รกฺขิสฺสติ อิมินา อคฺคิปริจรเณน นิรตฺถเกน ภวิตพฺพํ นตฺถิ อิโตนิทานํ กุสลํ วา วุฑฺฒิ วาติ ฯ โส อคฺคิปาริจริยาย วิคตจฺฉนฺโท อมฺโภ อคฺคิ ตฺวํ อตฺตโนปิ สนฺตกํ รกฺขิตุํ อสกฺโกนฺโต มํ กทา รกฺขิสฺสสิ มํสํ นตฺถิ เอตฺตเกนปิ ตุสฺสาหีติ นงฺคุฏฺฐาทีนิ อคฺคิมฺหิ ปกฺขิปนฺโต อิมํ คาถมาห

พหุมฺเปตํ อสพฺภิ ชาตเวท

ยนฺตํ วาลธินาภิปูชยาม

มํสารหสฺส นตฺถชฺช มํสํ

นงฺคุฏฺฐมฺปิ ภวํ ปฏิคฺคหาตูติ ฯ

ตตฺถ พหุมฺเปตนฺติ เอตฺตกมฺปิ พหุํ ฯ อสพฺภีติ อสปฺปุริส อสาธุชาติก ฯ ชาตเวทาติ อคฺคึ อาลปติ ฯ อคฺคิ หิ ชาตมตฺโตว เวทิยติ ขายติ ปากโฏ โหติ ตสฺมา ชาตเวโทติ วุจฺจติ ฯ ยนฺตํ วาลธินาภิปูชยามาติ ยํ อชฺช มยํ อตฺตโนปิ สนฺตกํ รกฺขิตุํ อสมตฺถํ ภควนฺตํ วาลธินา อภิปูชยาม เอตมฺปิ เต พหุเมวาติ ทสฺเสติ ฯ มํสารหสฺสาติ มํสารหสฺส ตุยฺหํ นตฺถิ อชฺช มํสํ ฯ นงฺคุฏฺฐมฺปิ ภวํ ปฏิคฺคหาตูติ อตฺตโน สนฺตกํ รกฺขิตุํ อสกฺโกนฺโต ภวํ อิมํ สชงฺฆจมฺมํ นงฺคุฏฺฐมฺปิ ปฏิคฺคณฺหตูติ ฯ

เอวํ วตฺวา มหาสตฺโต อคฺคึ อุทเกน นิพฺพาเปตฺวา อิสิปพฺพชฺชํ ปพฺพชิตฺวา อภิญฺญา จ สมาปตฺติโย จ นิพฺพตฺเตตฺวา พฺรหฺมโลกปรายโน อโหสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา นิพฺพุตคฺคิตาปโส อหเมวาติ ฯ

นงฺคุฏฺฐชาตกํ จตุตฺถํ ฯ