๓. มักกฏชาดก

3 Makkaṭajātakaṃ

tāta māṇavako esoti idaṃ satthā jetavane viharanto ekaṃ kuhakaṃ bhikkhuṃ ārabbha kathesi.

Vatthu pakiṇṇakanipāte uddālakajātake āvibhavissati.

Tadā pana satthā bhikkhave nāyaṃ bhikkhu idāneva kuhako pubbepi makkaṭo hutvāpi aggissa kāraṇā kohaññaṃ akāsi yevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto Ekasmiṃ kāsikagāmake brāhmaṇakule nibbattitvā vayappatto takkasilāyaṃ sippaṃ uggaṇhitvā gharāvāsaṃ saṇṭhapesi. Athassa brāhmaṇī ekaṃ puttaṃ vijāyitvā puttassa ādhāvitvā paridhāvitvā vicaraṇakāle kālamakāsi. Bodhisatto tassā petakiccaṃ katvā kiṃ me idāni gharāvāsena, puttaṃ gahetvā pabbajissāmīti assumukhaṃ ñātimittavaggaṃ pahāya puttaṃ ādāya himavantaṃ pavisitvā isipabbajjaṃ pabbajitvā tattha vanamūlaphalāhāro vāsaṃ kappesi. So ekadivasaṃ vassānakāle deve vassante sāradārūni jāletvā visibbento phalakaṭṭhantare 1- nipajji. Puttopissa tāpasakumārako pitu pāde sambāhanto nisīdi. Atheko vanamakkaṭo sītena pīḷiyamāno tassa paṇṇasālāya taṃ aggiṃ disvā sacāhaṃ ettha pavisissāmi, makkaṭo makkaṭoti maṃ pothetvā nīharissanti, aggiṃ visibbetuṃ na labhissāmīti atthi idāni me upāyoti tāpasavesaṃ gahetvā kohaññaṃ katvā pavisissāmīti cintetvā ekassa matatāpasassa vakkalāni nivāsetvā pacchiñca aṅkusañca yaṭṭhiñca gahetvā paṇṇasāladvāre ekaṃ tālarukkhaṃ nissāya saṅkuṭiko aṭṭhāsi. Tāpasakumārako taṃ disvā makkaṭabhāvaṃ ajānanto eko mahallakatāpaso sītena pīḷito aggiṃ visibbetuṃ āgato bhavissatīti tāpasassa kathetvā ekaṃ paṇṇasālaṃ pavesetvā visibbetuṃ vaṭṭatīti cintetvā pitaraṃ ālapanto paṭhamaṃ gāthamāha

@Footnote: 1 phalakattharetipi.

Tāta māṇavako eso tālamūlaṃ apassito,

agārakañcidaṃ atthi, handa demassagārakanti.

Tattha māṇavakoti sattādhivacanaṃ. Tena tāta eso eko māṇavo satto eko tāpasoti dīpeti. Tālamūlaṃ apassitoti tālakhandhaṃ nissāya ṭhito. Agārakañcidaṃ atthīti idañca amhākaṃ pabbajitāgāraṃ atthi, paṇṇasālaṃ sandhāya vadati. Handāti vavassaggatthe nipāto. Demassagārakanti etassa ekamante vasanatthāya agāraṃ dema.

Bodhisatto puttassa vacanaṃ sutvā uṭṭhāya paṇṇasāladvāre ṭhatvā olokento tassa makkaṭabhāvaṃ ñatvā tāta manussānaṃ nāma na evarūpaṃ mukhaṃ hoti, makkaṭo na yidha pakkositabboti vatvā dutiyaṃ gāthamāha

mā kho taṃ tāta pakkosi, dūseyya no agārakaṃ,

netādisaṃ mukhaṃ hoti brāhmaṇassa susīlinoti.

Tattha dūseyya no agārakanti ayaṃ hi idha paviṭṭho samāno imaṃ kicchena kataṃ paṇṇasālaṃ agginā vā jhāpento uccārādīni vā karonto dūseyya. Netādisanti na etādisaṃ brāhmaṇassa susīlino mukhaṃ hoti.

Makkaṭo esoti vatvā bodhisatto ekaṃ ummukaṃ gahetvā kiṃ ettha tiṭṭhasīti khipitvā taṃ palāpesi. Makkaṭopi vakkalāni chaḍḍetvā rukkhaṃ abhirūhitvā vanasaṇḍaṃ pāvisi. Bodhisatto cattāro Brahmavihāre bhāvetvā brahmalokaparāyano ahosi.

Satthā imaṃ dhammadesanaṃ āharitvā jātakaṃ samodhānesi. Tadā makkaṭo kuhakabhikkhu ahosi, tāpasakumāro rāhulo, tāpaso pana ahamevāti.

Makkaṭajātakaṃ tatiyaṃ.