๕. ขราทิยชาดก

5 Kharādiyajātakaṃ

aṭṭhakhuraṃ kharādiyeti idaṃ satthā jetavane viharanto aññataraṃ dubbacabhikkhuṃ ārabbha kathesi.

So kira bhikkhu dubbaco ovādaṃ na gaṇhāti. Atha naṃ satthā pucchi saccaṃ kira tvaṃ bhikkhu dubbaco ovādaṃ na gaṇhasīti. Saccaṃ bhagavāti. Satthā pubbepi tvaṃ dubbacatāya paṇḍitānaṃ ovādaṃ Agahetvā pāsena bandho jīvitakkhayaṃ pattoti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto migo hutvā migagaṇaparivuto araññe vasati. Athassa bhaginī migī puttakaṃ dassetvā bhātika ayante bhāgineyyo ekaṃ migamāyaṃ uggaṇhāpehīti paṭicchāpesi. So taṃ bhāgineyyaṃ asukavelāya nāma āgantvā uggaṇhāhīti āha. So vuttavelāya na gacchati. Yathāpekadivasaṃ evaṃ sattadivase atikkante so migamāyaṃ anuggaṇhitvā vicaranto pāse bajjhi. Mātāpissa bhātaraṃ upasaṅkamitvā kinte bhātika bhāgineyyo migamāyaṃ uggaṇhāpitoti pucchi. Bodhisatto ca tassa anovādakassa mā cintayi na te puttena migamāyā uggaṇhitāti vatvā idāni taṃ anovaditukāmova hutvā idaṃ gāthamāha

aṭṭhakhuraṃ kharādiye migaṃ vaṅkātivaṅkinaṃ

sattakālehatikkantaṃ na naṃ ovaditussaheti.

Tattha aṭṭhakhuranti ekekasmiṃ pāde dvinnaṃ dvinnaṃ khurānaṃ vasena aṭṭhakhuraṃ. Kharādiyeti taṃ nāmena ālapati. Miganti sabbasaṅgāhikavacanaṃ. Vaṅkātivaṅkinanti mūle vaṅkāni agge ativaṅkānīti vaṅkātivaṅkāni. Tādisāni siṅgāni assa atthīti vaṅkātivaṅkaṃ. Taṃ vaṅkātivaṅkinaṃ. Sattakālehatikkantanti sattahi ovādakālehi ovādaṃ atikkantaṃ. Na naṃ ovaditussaheti etaṃ dubbacamigaṃ ahaṃ ovadituṃ na ussahāmi etassa me ovādatthāya cittampi na uppajjatīti dasseti.

Atha naṃ dubbacamigaṃ pāsena bandhaṃ luddo māretvā maṃsaṃ ādāya pakkāmi.

Satthāpi na tvaṃ bhikkhu idāneva dubbaco pubbepi dubbacoyevāti idaṃ dhammadesanaṃ āharitvā anusandhiṃ ghaṭetvā jātakaṃ samodhānesi tadā bhāgineyyamigo dubbacabhikkhu ahosi bhaginī uppalavaṇṇā ovādakamigo pana ahameva ahosīti.

Kharādiyajātakaṃ pañcamaṃ.