๗. มิตตามิตตชาดก

7 Mittāmittajātakaṃ

na naṃ umhayate disvāti idaṃ satthā sāvatthiyaṃ viharanto aññataraṃ bhikkhuṃ ārabbha kathesi.

Aññataro bhikkhu mayā gahite mayhaṃ upajjhāyo na kujjhissatīti upajjhāyena ṭhapitaṃ vissāsena ekaṃ vatthakhaṇḍaṃ gahetvā upāhanatthavikaṃ katvā pacchā upajjhāyaṃ āpucchi. Atha naṃ upajjhāyo kiṃkāraṇā gaṇhīti vatvā mayā gahite na kujjhissatīti tumhākaṃ vissāsenāti vutte ko mayā saddhiṃ tuyhaṃ vissāso nāmāti vatvā kuddho uṭṭhahitvā pahari. Tassa sā kiriyā bhikkhūsu pākaṭā jātā. Athekadivasaṃ bhikkhū dhammasabhāyaṃ kathaṃ samuṭṭhāpesuṃ āvuso asuko kira daharo bhikkhu upajjhāyassa vissāsena vatthakhaṇḍaṃ gahetvā upāhanatthavikaṃ akāsi, atha naṃ upajjhāyo ko mayā saddhiṃ tuyhaṃ vissāso Nāmāti vatvā kuddho uṭṭhahitvā paharīti. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva esa bhikkhu attano saddhivihārikena saddhiṃ avissāsiko, pubbepi avissāsiko yevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto

kāsikaraṭṭhe brāhmaṇakule nibbattitvā vayappatto isipabbajjaṃ pabbajitvā abhiññā ca samāpattiyo ca nibattetvā gaṇasatthā hutvā himavantappadese vāsaṃ kappesi . Tasmiṃ isigaṇe eko tāpaso bodhisattassa vacanaṃ akatvā ekaṃ matamātikaṃ hatthipotakaṃ paṭijaggi. Atha naṃ so vuḍḍhippatto māretvā araññaṃ pāvisi. Tassa sarīrakiccaṃ katvā isigaṇo bodhisattaṃ parivāretvā bhante kena nu kho kāraṇena mittabhāvo vā amittabhāvo vā sakkā jānitunti pucchi. Bodhisatto iminā ca iminā ca kāraṇenāti ācikkhanto imā gāthā avoca

na naṃ umhayate disvā na ca naṃ paṭinandati

cakkhūni cassa na dadāti paṭilomañca vattati,

ete bhavanti ākārā amittasmiṃ patiṭṭhitā

yehi amittaṃ jāneyya disvā sutvā ca paṇḍitoti.

Tattha na naṃ umhayate disvāti yo hi yassa amitto hoti, so taṃ disvā na umhayate hasati sitaṃ na karoti pahaṭṭhākāraṃ na dasseti. Na ca naṃ paṭinandatīti tassa vacanaṃ sutvāpi taṃ puggalaṃ Na paṭinandati sādhu subhāsitanti nābbhanumodati. Cakkhūni cassa na dadātīti cakkhunā cakkhuṃ āhacca paṭimukho hutvā na oloketi aññato va cakkhūni harati. Paṭilomañca vattatīti tassa kāyakammaṃ vacīkammampi na roceti paṭilomagāhaṃ gaṇhāti paccanikagāhaṃ. Ākārāti kāraṇāni. Yehi amittanti yehi kāraṇehi, tāni kāraṇāni disvā ca sutvā ca paṇḍito puggalo ayaṃ me amittoti jāneyya. Tato viparītehi pana mittabhāvo jānitabboti.

Evaṃ bodhisatto mittāmittabhāvakāraṇāni ācikkhitvā brahmavihāre bhāvetvā brahmalokūpago ahosi.

Satthā imaṃ dhammadesanaṃ āharitvā jātakaṃ samodhānesi. Tadā hatthiposakatāpaso saddhivihāriko ahosi, hatthī upajjhāyo, isigaṇā buddhaparisā, gaṇasatthā pana ahamevāti.

Mittāmittajātakaṃ sattamaṃ.