๙. อายาจิตภัตตชาดก

9 Āyācitabhattajātakaṃ

sace muñceti idaṃ satthā jetavane viharanto devatānaṃ āyācanabalikammaṃ ārabbha kathesi.

Tadā kira manussā vaṇijjāya gacchantā pāṇe vadhitvā devatānaṃ balikammaṃ katvā mayaṃ anantarāyena atthasiddhiṃ patvā āgantvā puna tumhākaṃ balikammaṃ karissāmāti āyācitvā gacchanti. Tattha anantarāyena atthasiddhiṃ patvā āgantvā devatānubhāvena idaṃ jātanti maññamānā bahū pāṇe vadhitvā āyācanato muccituṃ balikammaṃ karonti. Taṃ disvā bhikkhū atthi nu kho bhante ettha atthoti bhagavantaṃ pucchiṃsu. Bhagavā atītaṃ āhari.

Atīte kāsiraṭṭhe ekasmiṃ gāmake eko kuṭumbiko gāmadvāre ṭhite nigrodharukkhe adhivatthāya devatāya balikammaṃ paṭijānitvā anantarāyena āgantvā bahū pāṇe vadhitvā āyācanato muccissāmīti rukkhamūlaṃ gato. Rukkhadevatā khandhaviṭape ṭhatvā idaṃ gāthamāha

sace muñce pecca muñce muccamāno hi bajjhasi

na hevaṃ dhīrā muccanti mutti bālassa bandhananti.

Tattha sace muñce pecca muñceti bho purisa tvaṃ sace muñce yadi muccitukāmosi pecca muñce yathā paralokena bajjhasi evaṃ muñca. Muccamāno hi bajjhasīti yathā pana tvaṃ pāṇaṃ vadhitvā muccituṃ icchasi evaṃ muccamāno hi pāpena kammena Bajjhasi. Kasmā. Na hevaṃ dhīrā muccantīti ye pana paṇḍitā purisā te evaṃ paṭissavato na muccantīti. Kiṃkāraṇā evarūpā hi mutti bālassa bandhanaṃ esā pāṇātipātaṃ katvā mutti nāma bālassa bandhanameva hotīti dhammaṃ desesi.

Tato paṭṭhāya manussā evarūpā pāṇātipātakammā viratā dhammaṃ caritvā devanagaraṃ pūrayiṃsu.

Satthā idaṃ dhammadesanaṃ āharitvā anusandhiṃ ghaṭetvā jātakaṃ samodhānesi ahaṃ tena samayena rukkhadevatā ahosinti.

Āyācitajātakaṃ navamaṃ.