๗. เสคคุชาดก

7 Seggujātakaṃ

sabbo lokoti idaṃ satthā jetavane viharanto ekaṃ paṇṇikaṃ upāsakaṃ ārabbha kathesi. Vatthu ekanipāte vitthāritameva.

Idhāpi satthā taṃ upāsakaṃ kiṃ upāsaka cirassaṃ āgatosīti pucchi. Dhītā me bhante niccaṃ hasitamukhī, tamahaṃ vīmaṃsitvā ekassa kuladārakassa adāsiṃ, tattha itikattabbatāya tumhākaṃ dassanāya āgantuṃ okāsaṃ na labhinti āha. Atha naṃ satthā na kho upāsaka idāneva sā sīlavatī pubbepi sīlavatī, tvañca na idāneva taṃ vīmaṃsasi pubbepi vīmaṃsasi yevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto rukkhadevatā ahosi. Tadā ayameva paṇṇikaupāsako dhītaraṃ vīmaṃsissāmīti araññaṃ netvā kilesavasena icchanto viya hatthe gaṇhi. Atha naṃ paridevamānaṃ paṭhamagāthāya ajjhabhāsi.

Sabbo loko attamano ahosi,

akovidā gāmadhammassa seggu,

komāriko nāma tavajja dhammo

yaṃ tvaṃ gahitā pavane parodasīti.

Tattha sabbo loko attamano ahosīti amma sakalopi sattaloko etissā kāmasevanāya attamano jāto. Akovidā gāmadhammassa seggūti seggūti tassā nāmaṃ, tena tvaṃ pana amma seggu akovidā gāmadhammassa. Imasmiṃ gāmadhamme vasaladhamme akusalāsīti vuttaṃ hoti. Komāriko nāma tavajja dhammoti amma kumāriko nāmesa tavajja sabhāvo. Yaṃ tvaṃ gahitā pavane parodasīti tvaṃ mayā imasmiṃ pavane santhavavasena hatthe gahitā parodasi na sampaṭicchasi, ko esa tava sabhāvo, kiṃ kumārī yeva tvanti pucchati.

Taṃ sutvā kumārikā āma tāta kumārikā yevāhaṃ, nāhaṃ methunadhammaṃ nāma jānāmīti vatvā paridevamānā dutiyaṃ gāthamāha

yo dukkhaphuṭṭhāya bhaveyya tāṇaṃ

so me pitā dubbhi vane karoti,

Sā kassa kandāmi vanassa majjhe,

yo tāyitā so sahasā karotīti.

Sā heṭṭhā kathitā yeva.

Iti so paṇṇiko tadā dhītaraṃ vīmaṃsitvā gehaṃ netvā kuladārakassa datvā yathākammaṃ gato.

Satthā imaṃ dhammadesanaṃ āharitvā saccāni pakāsetvā jātakaṃ samodhānesi. Saccapariyosāne paṇṇikaupāsako sotāpattiphale patiṭṭhahi. Tadā dhītā dhītā yeva, pitā pitā yeva ahosi. Tassa pana kāraṇassa paccakkhakārī rukkhadevatā pana ahamevāti.

Seggujātakaṃ sattamaṃ.