๕. รุจิรชาดก

รุจิรชาตกํ

กายํ พลากา รุจิราติ อิทํ สตฺถา เชตวเน วิหรนฺโต เอกํ โลลภิกฺขุํ อารพฺภ กเถสิ ฯ เทฺวปิ วตฺถูนิ ปุริมสทิสาเนว ฯ คาถา ปน นานา ฯ

กายํ พลากา รุจิรา กากนิณฺฑสฺมิ อจฺฉติ

จณฺโฑ กาโก สขา มยฺหํ ยสฺส เจตํ กุลาวกํ ฯ

นนุ มํ สมฺม ชานาสิ ทิชา สามากโภชนา

อกตฺวา วจนํ ตุยฺหํ ปสฺส ลูโนสฺมิ อาคโต ฯ

ปุนปาปชฺชสี สมฺม สีลํ หิ ตว ตาทิสํ

น หิ มานุสิกา โภคา สุภุญฺชา โหนฺติ ปกฺขินาติ ฯ คาถา หิ เอกนฺตริกาเยว ฯ

ตตฺถ รุจิราติ ตกฺกมกฺขิตสรีรตาย เสตวณฺณตํ สนฺธาย วทติ ฯ รุจิราติ ปิยทสฺสนา ปณฺฑราติ อตฺโถ ฯ กากนิณฺฑสฺมินฺติ กากกุลาวเก ฯ กากนีฬสฺมินฺติปิ ปาโฐ ฯ ทิชาติ กาโก ปาราวตํ อาลปติ ฯ สามากโภชนาติ ติณพีชโภชนา ฯ สามากคหเณน เหตฺถ สพฺพมฺปิ ติณพีชํ สงฺคหิตํ ฯ

อิธาปิ โพธิสตฺโต น อิทานิ สกฺกา อิโต ปฏฺฐาย มยา เอตฺถ วสิตุนฺติ อุปฺปติตฺวา อญฺญตฺถ คโต ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน โลลภิกฺขุ อนาคามิผเล ปติฏฺฐหิ ฯ ตทา โลลกาโก โลลภิกฺขุ อโหสิ ฯ ปาราวโต ปน อหเมวาติ ฯ

รุจิรชาตกํ ปญฺจมํ