๑๐. ปูฏทูสกชาดก

Pūṭadūsakajātakaṃ

addhā hi nūna migarājāti idaṃ satthā jetavane viharanto ekaṃ kumāraṃ pūṭadūsakaṃ ārabbha kathesi.

Sāvatthiyaṃ kireko amacco buddhappamukhaṃ bhikkhusaṅghaṃ nimantetvā uyyāne nisīdāpetvā dānaṃ dadamāno antarābhatte uyyāne vicaritukāmā carantūti āha. Bhikkhū uyyānacārikaṃ cariṃsu. Tasmiṃ khaṇe uyyānapālo pattasampannaṃ rukkhaṃ abhirūhitvā mahantamahantāni pattāni gahetvā ayaṃ pupphānaṃ bhavisasati ayaṃ phalānanti pūṭe katvā rukkhamūle pātesi. Tassa puttadārako pātitaṃ pātitaṃ pūṭaṃ viddhaṃseti. Bhikkhū tamatthaṃ satthu ārocesuṃ. Satthā na bhikkhave idāneva pubbepesa pūṭadūsakoyevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto bārāṇasiyaṃ ekasmiṃ brāhmaṇakule nibbattitvā vayappatto agāraṃ ajjhāvasamāno ekadivasaṃ kenacideva karaṇīyena uyyānaṃ agamāsi. Tattha bahū vānarā vasanti. Uyyānapālo pana imināva niyāmena pattapūṭe pāteti. Jeṭṭhakavānaro pātitapātite viddhaṃseti. Bodhisatto taṃ āmantetvā uyyānapālena pātitapātite pūṭe viddhaṃsetvā pātitapātitaṃ manāpataraṃ kātukāmo maññasīti vatvā paṭhamaṃ gāthamāha

Addhā hi nūna migarājā pūṭakammassa kovido

tathā hi pūṭaṃ dūseti aññaṃ nūna karissatīti.

Tattha migarājāti makkaṭaṃ vaṇṇento vadati. Pūṭakammassāti mālāpūṭakaraṇassa. Kovidoti cheko. Ayaṃ panettha saṅkhepattho ayaṃ hi migarājā ekaṃsena pūṭakammassa kovido maññe tathā hi aññaṃ pātitaṃ pūṭaṃ dūseti aññaṃ nūna tato manāpataraṃ karissatīti.

Taṃ sutvā makkaṭo dutiyaṃ gāthamāha

na me pitā vā mātā vā pūṭakammassa kovidā

kataṃ kataṃ kho dūsema evaṃdhammamidaṃ kulanti.

Taṃ sutvā bodhisatto tatiyaṃ gāthamāha

yesaṃ vo īdiso dhammo adhammo pana kīdiso

mā vo dhammaṃ adhammaṃ vā addasāma kudācananti. Vatvā capana vānaragaṇaṃ garahitvā pakkāmi.

Satthā imaṃ dhammadesanaṃ āharitvā saccāni pakāsetvā jātakaṃ samodhānesi tadā vānaro pūṭadūsakadārako ahosi paṇḍitapuriso pana ahamevāti.

Pūṭadūsakajātakaṃ dasamaṃ

udapānavaggo tatiyo