๑๐. สีลวีมังสชาดก

สีลวีมํสชาตกํ

สีลํ กิเรว กลฺยาณนฺติ อิทํ สตฺถา เชตวเน วิหรนฺโต สีลวีมํสกพฺราหฺมณํ อารพฺภ กเถสิ ฯ

เทฺวปิ วตฺถูนิ เหฏฺฐา กถิตาเนว ฯ อิธ ปน โพธิสตฺโต พาราณสีรญฺโญ ปุโรหิโต อโหสิ ฯ โส อตฺตโน สีลํ วีมํสนฺโต ตีณิ ทิวสานิ หิรญฺญผลกโต ๑- กหาปณํ คณฺหิ ฯ ตํ โจโรติ รญฺโญ ทสฺเสสุํ ฯ โส รญฺโญ สนฺติเก ฐิโต

สีลํ กิเรว กลฺยาณํ สีลํ โลเก อนุตฺตรํ

ปสฺส โฆรวิโส นาโค สีลวาติ น หญฺญตีติ อิมาย ปฐมคาถาย สีลํ วณฺเณตฺวา ราชานํ ปพฺพชฺชํ อนุชานาเปตฺวา ปพฺพชิตุํ คจฺฉติ ฯ

อเถกสฺมึ สูนาปเณ เสโน มํสเปสึ คเหตฺวา อากาสํ ปกฺขนฺทิ ฯ ตํ อญฺเญ สกุณา ปริวาเรตฺวา ปาทนขตุณฺฑกาทีหิ ปหรนฺติ ฯ โส ตํ ทุกฺขํ สหิตุํ อสกฺโกนฺโต มํสเปสึ ฉฑฺเฑสิ ฯ อปโร คณฺหิ ฯ โสปิ ตเถว วิเหฐิยมาโน ฉฑฺเฑสิ ฯ อถญฺเญ คณฺหนฺตีติ เอวํ โย โย คณฺหาติ ตํ ตํ สกุณา อนุพนฺธึสุ ฯ โย โย ฉฑฺเฑสิ โส โส สุขิโต อโหสิ ฯ โพธิสตฺโต ตํ ทิสฺวา อิเม กามา นาม มํสเปสุปมา เอวํ เตสํ คณฺหนฺตานญฺเญว ทุกฺขํ วิสชฺเชนฺตานํ สุขนฺติ จินฺเตตฺวา ทุติยํ คาถมาห

ยาวเทวสฺสหู กิญฺจิ ตาวเทว อขาทิสุํ

สงฺคมฺม กุลลา โลเก น หึสนฺติ อกิญฺจนนฺติ ฯ

ตสฺสตฺโถ ยาวเทว อสฺส เสนสฺส อหุ กิญฺจิ มุเขน คหิตํ มํสขณฺฑํ ตาวเทว นํ อิมสฺมึ โลเก กุลลา สมาคนฺตฺวา อขาทิสุํ ตสฺมึ ปน วิสฏฺเฐ ตเมนํ อกิญฺจนํ นิปฺปลิโพธํ ปกฺขึ

@เชิงอรรถ: ๑ เหรญฺญิกผลกโต ฯ เสสปกฺขิโน น หึสนฺตีติ ฯ

โส นครา นิกฺขมิตฺวา อนฺตรามคฺเค เอกสฺมึ คาเม สายํ เอกสฺส เคเห นิปชฺชิ ฯ ตตฺถ ปน ปิงฺคลา นาม ทาสี อสุกเวลาย นาม อาคจฺเฉยฺยาสีติ เอเกน ปุริเสน สทฺธึ สงฺเกตํ อทาสิ ฯ สา สามิกานํ ปาเท โธวิตฺวา เตสุ นิปนฺเนสุ ตสฺส อาคมนํ โอโลเกนฺตี อุมฺมาเร นิสีทิตฺวา อิทานิ อาคมิสฺสติ อิทานิ อาคมิสฺสตีติ ปฐมยามมฺปิ มชฺฌิมยามมฺปิ วีตินาเมสิ ฯ ปจฺจูสสมเย ปน น โสทานิ อาคมิสฺสตีติ ฉินฺนาสา หุตฺวา นิปชฺชิตฺวา นิทฺทํ โอกฺกมิ ฯ โพธิสตฺโต อิทํ การณํ ทิสฺวา อยํ ทาสี โส ปุริโส อาคมิสฺสตีติ อาสาย เอตฺตกํ กาลํ นิสินฺนา อิทานิสฺส อนาคมนภาวํ ญตฺวา ฉินฺนาสา หุตฺวา สุขํ สุปติ กิเลเสสุ หิ อาสา นาม ทุกฺขํ นิราสภาโวว สุขนฺติ จินฺเตตฺวา ตติยํ คาถมาห

สุขํ นิราสา สุปติ อาสา ผลวตี สุขา

อาสํ นิราสํ กตฺวาน สุขํ สุปติ ปิงฺคลาติ ฯ

ตตฺถ ผลวตีติ ยสฺสา อาสาย ผลํ ลทฺธํ โหติ สา ตสฺส ผลสฺส สุขตาย สุขา นาม ฯ นิราสํ กตฺวา อนาสํ กตฺวา ฉินฺทิตฺวา ปชหิตฺวาติ อตฺโถ ฯ ปิงฺคลาติ เอสา ปิงฺคลทาสี อิทานิ สุขํ สุปตีติ ฯ

โสปุน ทิวเส ตโต คามา อรญฺญํ ปวิสนฺโต อรญฺเญ เอกํ ตาปสํ ฌานํ อปฺเปตฺวา นิสินฺนํ ทิสฺวา อิธโลเก จ ปรโลเก จ ฌานสุขโต อุตฺตริตรํ สุขํ นตฺถีติ จินฺเตตฺวา จตุตฺถํ คาถมาห

น สมาธิปโร อตฺถิ อสฺมึ โลเก ปรมฺหิ จ

น ปรํ นาปิ อตฺตานํ วิหึสติ สมาหิโตติ ฯ

ตตฺถ สมาธิปโรติ สมาธิโต ปโร อญฺโญ สุขธมฺโม นาม นตฺถีติ ฯ

โส อรญฺญํ ปวิสิตฺวา อิสิปพฺพชฺชํ ปพฺพชิตฺวา ฌานาภิญฺญา อุปฺปาเทตฺวา พฺรหฺมโลกปรายโน อโหสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา ตาปโส อหเมวาติ ฯ

สีลวีมํสชาตกํ ทสมํ

กุฏิทูสกวคฺโค ตติโย