๗. สาลิยชาดก

สาลิยชาตกํ

ยฺวายํ สาลิยจฺฉาโปติ อิทํ สตฺถา เวฬุวเน วิหรนฺโต อาวุโส เทวทตฺโต ตาสการโกปิ ภวิตุํ นาสกฺขีติ วจนํ อารพฺภ กเถสิ ฯ

ตทา หิ สตฺถา น ภิกฺขเว อิทาเนว ปุพฺเพเปส มม ตาสการโกปิ ภวิตุํ นาสกฺขีติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต คามเก กุฏุมฺพิยกุเล นิพฺพตฺติตฺวา ตรุณกาเล ปํสุกีฬเกหิ ทารเกหิ สทฺธึ คามทฺวาเร นิโคฺรธรุกฺขมูเล กีฬติ ฯ ตทา เอโก ทุพฺพลเวชฺโช คาเม กิญฺจิ กมฺมํ อลภิตฺวา นิกฺขนฺโต ตํ ฐานํ ปตฺวา เอกํ สปฺปํ วิฏปพฺภนฺตเรน สีสํ นีหริตฺวา นิทฺทายนฺตํ ทิสฺวา มยา คาเม กิญฺจิ น ลทฺธํ อิเม ทารเก วญฺเจตฺวา สปฺเปน ฑํสาเปตฺวา ติกิจฺฉิตฺวา กิญฺจิเทว คณฺหิสฺสามีติ จินฺเตตฺวา โพธิสตฺตํ อาห สเจ สาลิยจฺฉาปํ ปสฺเสยฺยาสิ คณฺเหยฺยาสีติ ฯ อาม คณฺเหยฺยนฺติ ฯ ปสฺเสโส วิฏปพฺภนฺตเร สยิโตติ ฯ โส ตสฺส สปฺปภาวํ อชานนฺโต รุกฺขํ อารุยฺห ตํ คีวายํ คเหตฺวา สปฺโปติ ญตฺวา นิวตฺติตุํ อเทนฺโต สุคฺคหิตํ คเหตฺวา เวเคน ขิปิ ฯ โส คนฺตฺวา เวชฺชสฺส คีวายํ ปติโต คีวํ ปลิเวเฐตฺวา กร กราติ ฑํสิตฺวา ตตฺเถว นํ ปาเตตฺวา ปลายิ ฯ มนุสฺสา ปริวารยึสุ ฯ มหาสตฺโต สมฺปตฺตปริสาย ธมฺมํ เทเสนฺโต อิมา คาถา อภาสิ

ยฺวายํ สาลิยจฺฉาโปติ กณฺหสปฺปํ อคาหยิ

เตน สปฺเปนยํ ทฏฺโฐ หโต ปาปานุสาสโก

อหนฺตรมหนฺตารํ ๑- โย นโร หนฺตุมิจฺฉติ

เอวํ โส นิหโต เสติ ยถายํ ปุริโส หโต

อหนนฺตมฆาเตนฺตํ โย นโร หนฺตุมิจฺฉติ

เอวํ โส นิหโต เสติ ยถายํ ปุริโส หโต

ยถา ปํสุมุฏฺฐิ ปุริโส ปฏิวาตํ ปฏิกฺขิเป

ตเมว โส รโช หนฺติ ยถายํ ปุริโส หโต

โย อปฺปทุฏฺฐสฺส นรสฺส ทุสฺสติ

สุทฺธสฺส โปสสฺส อนงฺคณสฺส

ตเมว พาลํ ปจฺเจติ ปาปํ

สุขุโม รโช ปฏิวาตํว ขิตฺโตติ ฯ

ตตฺถ ยฺวายนฺติ โย อยํ ฯ อยเมว วา ปาโฐ ฯ สปฺเปนยนฺติ โย อยํ เตน สปฺเปน ทฏฺโฐ ฯ ปาปานุสาสโกติ ปาปกํ อนุสาสโก ฯ อหนฺตรนฺติ อปหรนฺตํ ฯ อหนฺตารนฺติ อมาเรนฺตํ ฯ เสตีติ มตสยนํ สยติ ฯ อฆาเตนฺตนฺติ อมาเรนฺตํ ฯ สุทฺธสฺสาติ นิรปราธสฺส ฯ โปสสฺสาติ สตฺตสฺส ฯ อนงฺคณสฺสาติ อิทมฺปิ นิรปราธภาวญฺเญว สนฺธาย วุตฺตํ ฯ ปจฺเจตีติ กมฺมสริกฺขกํ หุตฺวา ปฏิเอติ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา

@เชิงอรรถ: ๑. อหนนฺตมหนฺตารํ ฯ ทุพฺพลเวชฺโช เทวทตฺโต อโหสิ ปณฺฑิตทารโก ปน อหเมวาติ ฯ

สาลิยชาตกํ สตฺตมํ