๗. สาลิยชาดก

Sāliyajātakaṃ

yvāyaṃ sāliyacchāpoti idaṃ satthā veḷuvane viharanto āvuso devadatto tāsakārakopi bhavituṃ nāsakkhīti vacanaṃ ārabbha kathesi.

Tadā hi satthā na bhikkhave idāneva pubbepesa mama tāsakārakopi bhavituṃ nāsakkhīti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto gāmake kuṭumbiyakule nibbattitvā taruṇakāle paṃsukīḷakehi dārakehi saddhiṃ gāmadvāre nigrodharukkhamūle kīḷati. Tadā eko dubbalavejjo gāme kiñci kammaṃ alabhitvā nikkhanto taṃ ṭhānaṃ patvā ekaṃ sappaṃ viṭapabbhantarena sīsaṃ nīharitvā niddāyantaṃ disvā mayā gāme kiñci na laddhaṃ ime dārake vañcetvā sappena ḍaṃsāpetvā tikicchitvā kiñcideva gaṇhissāmīti cintetvā bodhisattaṃ āha sace sāliyacchāpaṃ passeyyāsi gaṇheyyāsīti. Āma gaṇheyyanti. Passeso viṭapabbhantare sayitoti. So tassa sappabhāvaṃ ajānanto rukkhaṃ āruyha taṃ gīvāyaṃ gahetvā sappoti ñatvā nivattituṃ adento suggahitaṃ gahetvā vegena khipi. So gantvā vejjassa gīvāyaṃ patito gīvaṃ paliveṭhetvā kara karāti ḍaṃsitvā tattheva naṃ pātetvā palāyi. Manussā parivārayiṃsu. Mahāsatto sampattaparisāya dhammaṃ desento imā gāthā abhāsi

Yvāyaṃ sāliyacchāpoti kaṇhasappaṃ agāhayi

tena sappenayaṃ daṭṭho hato pāpānusāsako

ahantaramahantāraṃ 1- yo naro hantumicchati

evaṃ so nihato seti yathāyaṃ puriso hato

ahanantamaghātentaṃ yo naro hantumicchati

evaṃ so nihato seti yathāyaṃ puriso hato

yathā paṃsumuṭṭhi puriso paṭivātaṃ paṭikkhipe

tameva so rajo hanti yathāyaṃ puriso hato

yo appaduṭṭhassa narassa dussati

suddhassa posassa anaṅgaṇassa

tameva bālaṃ pacceti pāpaṃ

sukhumo rajo paṭivātaṃva khittoti.

Tattha yvāyanti yo ayaṃ. Ayameva vā pāṭho. Sappenayanti yo ayaṃ tena sappena daṭṭho. Pāpānusāsakoti pāpakaṃ anusāsako. Ahantaranti apaharantaṃ. Ahantāranti amārentaṃ. Setīti matasayanaṃ sayati. Aghātentanti amārentaṃ. Suddhassāti niraparādhassa. Posassāti sattassa. Anaṅgaṇassāti idampi niraparādhabhāvaññeva sandhāya vuttaṃ. Paccetīti kammasarikkhakaṃ hutvā paṭieti.

Satthā imaṃ dhammadesanaṃ āharitvā jātakaṃ samodhānesi tadā

@Footnote: 1. ahanantamahantāraṃ. Dubbalavejjo devadatto ahosi paṇḍitadārako pana ahamevāti.

Sāliyajātakaṃ sattamaṃ