๕. ปานียชาดก

Mitto mittassa pānīyaṃ adinnaṃ paribhuñjisaṃ tena pacchā vijigucchiṃ taṃ pāpaṃ pakataṃ mayā mā puna akaraṃ pāpaṃ tasmā pabbajito ahaṃ.

Paradārañca disvāna chando me upapajjatha tena pacchā vijigucchiṃ taṃ pāpaṃ pakataṃ mayā mā puna akaraṃ pāpaṃ tasmā pabbajito ahaṃ.

Pitaraṃ me mahārāja corā aggaṇhu kānane tesāhaṃ pucchito jānaṃ aññathā naṃ viyākariṃ tena pacchā vijigucchiṃ taṃ pāpaṃ pakataṃ mayā mā puna akaraṃ pāpaṃ tasmā pabbajito ahaṃ.

Pāṇātipātamakaruṃ somayāge upaṭṭhite tesāhaṃ samanuññāsiṃ tena pacchā vijigucchiṃ taṃ pāpaṃ pakataṃ mayā mā puna akaraṃ pāpaṃ tasmā pabbajito ahaṃ.

Surāmerayamadhukā ye janā paṭhamāsu no bahunnaṃ te anatthāya majjapānamakappayuṃ tesāhaṃ samanuññāsiṃ tena pacchā vijigucchiṃ taṃ pāpaṃ pakataṃ mayā mā puna akaraṃ pāpaṃ tasmā pabbajito ahaṃ.

Dhiratthusu bahukāme 1- duggandhe bahukaṇṭake ye ahaṃ paṭisevanto nālabhiṃ tādisaṃ sukhaṃ.

Mahassādā sukhā kāmā natthi kāmā paraṃ sukhaṃ ye kāme paṭisevanti saggante upapajjare.

Appassādā dukhā kāmā natthi kāmā paraṃ dukkhaṃ ye kāme paṭisevanti nirayante upapajjare.

Asi yathā sunisito nettisova 2- supāyiko sattīva urasī khittā kāmā dukkhatarā tato.

Aṅgārānaṃva jalitaṃ kāsuṃ sādhikaporisaṃ phālaṃva divasantattaṃ kāmā dukkhatarā tato.

Visaṃ yathā halāhalaṃ telaṃ pakkuṭṭhitaṃ 3- yathā tambalohaṃ vilīnaṃva kāmā dukkhatarā tatoti. Pānīyajātakaṃ pañcamaṃ.