๖. มหากัณหชาดก

Kaṇho kaṇho ca ghoro ca sukkadāṭho patāpavā 1- bandho 2- pañcahi rajjūhi kiṃ vīra sunakho tava.

Nāyaṃ migānamatthāya usinnara 3- bhavissati manussānaṃ anayo hutvā tadā kaṇho pamokkhati.

Pattahatthā samaṇakā muṇḍā saṅghāṭipārutā naṅgalehi kasissanti tadā kaṇho pamokkhati.

Tapassiniyo pabbajitā muṇḍā saṅghāṭipārutā yadā loke gamissanti tadā kaṇho pamokkhati. @Footnote: 1 Ma. pabhāsavā . 2 Ma. baddho . 3 Sī. Yu. usīnara.

Dīghuttaroṭṭhā jaṭilā paṅkadantā rajassirā iṇaṃ codaya 1- gacchanti tadā kaṇho pamokkhati.

Adhicca vede sāvittiṃ yaññaṃ tatrañca 2- brāhmaṇā bhatikāya yajissanti tadā kaṇho pamokkhati.

Mātaraṃ pitaraṃ cāpi jiṇṇake gatayobbane pahusanto na bharanti tadā kaṇho pamokkhati.

Mātaraṃ pitaraṃ cāpi jiṇṇake gatayobbane bālā tumheti vakkhanti tadā kaṇho pamokkhati.

Ācariyabhāriyaṃ sakhiṃ 3- mātulāniṃ pitucchakiṃ 4- yadā loke gamissanti tadā kaṇho pamokkhati.

Asicammaṃ gahetvāna khaggaṃ paggayha brāhmaṇā panthaghātaṃ karissanti tadā kaṇho pamokkhati.

Sukkacchavī vedhaverā thūlabāhū apātubhā mittabhedaṃ karissanti tadā kaṇho pamokkhati.

Māyāvino nekatikā asappurisacintikā yadā loke bhavissanti tadā kaṇho pamokkhatīti. Mahākaṇhajātakaṃ chaṭṭhaṃ.