๘. สาเกตชาดก

๘. สาเกตชาตกํ

ยสฺมึ มโน นิวีสตีติ อิทํ สตฺถา สาเกตํ นิสฺสาย อญฺชนวเน วิหรนฺโต เอกํ พฺราหฺมณํ อารพฺภ กเถสิ ฯ

ภควโต กิร ภิกฺขุสงฺฆปริวุตสฺส สาเกตํ ปิณฺฑาย ปวิสนกาเล เอโก สาเกตนครวาสี มหลฺลกพฺราหฺมโณ นครโต พหิ คจฺฉนฺโต อนฺตรทฺวาเร ทสพลํ ทิสฺวา ปาเทสุ ปติตฺวา โคปฺผเกสุ คาฬฺหํ คเหตฺวา ตาต นนุ นาม ปุตฺเตหิ ชิณฺณกาเล มาตาปิตโร ปฏิชคฺคิตพฺพา กสฺมา เอตฺตกํ กาลํ อมฺหากํ อตฺตานํ น ทสฺเสสิ มยา ตาว ทิฏฺโฐสิ มาตรํ ปน ปสฺสิตุํ เอหีติ สตฺถารํ คเหตฺวา อตฺตโน เคหํ อคมาสิ ฯ สตฺถา ตตฺถ คนฺตฺวา นิสีทิ ปญฺญตฺตาสเน สทฺธึ ภิกฺขุสงฺเฆน ฯ พฺราหฺมณีปิ อิทานิ เม ปุตฺโต อาคโตติ อาคนฺตฺวา สตฺถุ ปาเทสุ ปติตฺวา ตาต เอตฺตกํ กาลํ กหํ คโตสิ นนุ นาม ปุตฺเตน มาตาปิตโร มหลฺลกกาเล อุปฏฺฐาตพฺพาติ ปริเทวิ ปุตฺตธีตโรปิ เอถ ภาตรํ วนฺทถาติ วนฺทาเปสิ ฯ อุโภ ตุฏฺฐมานสา มหาทานํ อทํสุ ฯ สตฺถา ภตฺตกิจฺจํ นิฏฺฐาเปตฺวา เตสํ ทฺวินฺนมฺปิ ชนานํ ชราสุตฺตํ กเถสิ ฯ สุตฺตปริโยสาเน อุโภปิ อนาคามิผเล ปติฏฺฐหึสุ ฯ สตฺถา อุฏฺฐายาสนา อญฺชนวนเมว อคมาสิ ฯ ภิกฺขู ธมฺมสภายํ สนฺนิสินฺนา กถํ สมุฏฺฐาเปสุํ อาวุโส พฺราหฺมโณ ตถาคตสฺส ปิตา สุทฺโธทโน มาตา มหามายาติ ชานาติ ชานนฺโตว สทฺธึ พฺราหฺมณิยา ตถาคตํ อมฺหากํ ปุตฺโตติ วทติ สตฺถาปิ อธิวาเสสิ กินฺนุ โข การณนฺติ ฯ สตฺถา เตสํ กถํ สุตฺวา ภิกฺขเว อุโภเปเต อตฺตโน ปุตฺตเมว ปุตฺโตติ วทนฺตีติ วตฺวา อตีตํ อาหริ ภิกฺขเว อยํ พฺราหฺมโณ อตีเต นิรนฺตรํ ปญฺจชาติสตานิ มยฺหํ ปิตา อโหสิ ปญฺจชาติสตานิ จุลฺลปิตา ปญฺจชาติสตานิ มหาปิตา เอสาปิ พฺราหฺมณี นิรนฺตรเมว ปญฺจชาติสตานิ มาตา อโหสิ ปญฺจชาติสตานิ จุลฺลมาตา ปญฺจชาติสตานิ มหามาตา เอวาหํ ทิยฑฺฒชาติสหสฺสํ พฺราหฺมณสฺส หตฺเถ สํวฑฺโฒ ทิยฑฺฒชาติสหสฺสํ พฺราหฺมณิยา หตฺเถ สํวฑฺโฒติ ตีณิ ชาติสหสฺสานิ กเถตฺวา อภิสมฺพุทฺโธ หุตฺวา อิมํ คาถมาห

ยสฺมึ มโน นิวีสติ จิตฺตญฺจาปิ ปสีทติ

อทิฏฺฐปุพฺพเก โปเส กามํ ตสฺมึปิ วิสฺสเสติ ฯ

ตตฺถ ยสฺมึ มโน นิวีสตีติ ยสฺมึ ปุคฺคเล ทิฏฺฐมตฺเตเยว จิตฺตํ ปติฏฺฐาติ ฯ จิตฺตญฺจาปิ ปสีทตีติ ยสฺมึ ทิฏฺฐมตฺเต จิตฺตมฺปิ ปสีทติ มุทุกํ โหติ ฯ อทิฏฺฐปุพฺพเก โปเสติ ปกติยา ตสฺมึ อตฺตภาเว อทิฏฺฐปุพฺเพปิ ปุคฺคเล ฯ กามํ ตสฺมึปิ วิสฺสเสติ อนุภูตปุพฺพสิเนหวเสเนว ตสฺมึปิ ปุคฺคเล เอกํเสน วิสฺสเส วิสฺสาสํ อาปชฺชติเยวาติ อตฺโถ ฯ

เอวํ สตฺถา อิมํ ธมฺมเทสนํ อาหริตฺวา อนุสนฺธึ ฆเฏตฺวา ชาตกํ สโมธาเนสิ ตทา พฺราหฺมโณ จ พฺราหฺมณี จ เอเตเอว อเหสุํ ปุตฺโตปิ อหเมวาติ ฯ

สาเกตชาตกํ อฏฺฐมํ ฯ