๖. อสังกิยชาดก

๖. อสงฺกิยชาตกํ

อสงฺกิโยมฺหิ คามมฺหีติ อิทํ สตฺถา เชตวเน วิหรนฺโต เอกํ สาวตฺถีวาสิอุปาสกํ อารพฺภ กเถสิ ฯ

โส กิร โสตาปนฺโน อริยสาวโก เกนจิเทว กรณีเยน เอเกน สกฏสตฺถวาเหน สทฺธึ มคฺคํ ปฏิปชฺชิตฺวา เอกสฺมึ อรญฺญฏฺฐาเน สกฏานิ โมเจตฺวา ขนฺธาวารพนฺเธ กเต สตฺถวาหสฺสาวิทูเร อญฺญตรสฺมึ รุกฺขมูเล จงฺกมติ ฯ อตฺตโน กาลํ สลฺลกฺเขตฺวาว ปญฺจสตา โจรา ขนฺธาวารํ วิลุมฺปิสฺสามาติ ธนุมุคฺคราทิหตฺถา คนฺตฺวา ตํ ฐานํ ปริวารยึสุ ฯ โสปิ อุปาสโก จงฺกมติเยว ฯ โจรา ตํ ทิสฺวา อทฺธา เอส ขนฺธาวารรกฺขโก ภวิสฺสติ อิมสฺส นิทฺทํ โอกฺกนฺตกาเล วิลุมฺปิสฺสามาติ อชฺโฌตฺถริตุํ อสกฺโกนฺตา ตตฺถ ตตฺเถว อฏฺฐํสุ ฯ โสปิ อุปาสโก ปฐมยาเมปิ มชฺฌิมยาเมปิ ปจฺฉิมยาเมปิ จงฺกมนฺโตเยว อฏฺฐาสิ ฯ ปจฺจูสกาโล ชาโต ฯ โจรา โอกาสํ อลภนฺตา คหิตคหิเต ปาสาณมุคฺคราทโย ฉฑฺเฑตฺวา ปลายึสุ ฯ อุปาสโกปิ อตฺตโน กมฺมํ นิฏฺฐาเปตฺวา ปุน สาวตฺถึ อาคนฺตฺวา สตฺถารํ อุปสงฺกมิตฺวา ภนฺเต อตฺตานํ รกฺขมานา ปรรกฺขกา โหนฺตีติ ปุจฺฉิ ฯ อาม อุปาสก อตฺตานํ รกฺขนฺโต ปรํ รกฺขติ ปรํ รกฺขนฺโต อตฺตานํ รกฺขติเยวาติ ฯ โส ยาว สุภาสิตมิทํ ภนฺเต ภควตา อหํ เอเกน สตฺถวาเหน สทฺธึ มคฺคํ ปฏิปนฺโน รุกฺขมูเล จงฺกมนฺโต อตฺตานํ รกฺขิสฺสามีติ สกลํ สตฺถํ รกฺขินฺติ อาห ฯ สตฺถา อุปาสก ปุพฺเพปิ ปณฺฑิตา อตฺตานํ รกฺขนฺตา ปรํ รกฺขึสูติ วตฺวา เตน ยาจิโต อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต ตทา โพธิสตฺโต พฺราหฺมณกุเล นิพฺพตฺติตฺวา วยปฺปตฺโต กาเมสุ อาทีนวํ ทิสฺวา อิสิปพฺพชฺชํ ปพฺพชิตฺวา หิมวนฺเต วสนฺโต โลณมฺพิลเสวนตฺถาย ชนปทํ อาคนฺตฺวา ชนปทจาริกํ จรนฺโต เอเกน สตฺถวาเหน สทฺธึ มคฺคํ ปฏิปชฺชิตฺวา เอกสฺมึ อรญฺญฏฺฐาเน สตฺเถ นิวิฏฺเฐ สตฺถโต อวิทูเร ฌานสุเขน วีตินาเมนฺโต อญฺญตรสฺมึ รุกฺขมูเล จงฺกมนฺโต อฏฺฐาสิ ฯ อถ โข ปญฺจสตโจรา สายมาสภตฺตสฺส ภุตฺตกาเล ตํ สกฏสตฺถํ วลุมฺปิสฺสามาติ อาคนฺตฺวา ปริวารยึสุ ฯ เต ตํ ตาปสํ ทิสฺวา สเจ อยํ อมฺเห ปสฺสิสฺสติ สตฺถวาสิกานํ อาโรเจสฺสติ เอตสฺส นิทฺทูปคตเวลาย วิลุมฺปิสฺสามาติ ตตฺเถว อฏฺฐํสุ ฯ ตาปโสปิ สกลมฺปิ รตฺตึ จงฺกมติเยว ฯ โจรา โอกาสํ อลภิตฺวา คหิตมุคฺครปาสาเณ ฉฑฺเฑตฺวา สกฏสตฺถวาสีนํ สทฺทํ ทตฺวา โภนฺโต สตฺถวาสิโน สเจ เอส รุกฺขมูเล จงฺกมนตาปโส อชฺช นาภวิสฺส สพฺเพ มหาวิโลปํ ปตฺวา อภวิสฺสํสุ เสฺว ตาปสสฺส มหาสกฺการํ กเรยฺยาถาติ วตฺวา ปกฺกมึสุ ฯ เต ปภาตาย รตฺติยา โจเรหิ ฉฑฺฑิเต มุคฺครปาสาณาทโย ทิสฺวา ภีตา โพธิสตฺตสฺส สนฺติกํ คนฺตฺวา วนฺทิตฺวา ภนฺเต ทิฏฺฐา โว โจราติ ปุจฺฉึสุ ฯ อาม อาวุโส ทิฏฺฐาติ ฯ ภนฺเต เอตฺตเก โว โจเร ทิสฺวา ภยํ วา สารชฺชํ วา น อุปฺปชฺชีติ ฯ โพธิสตฺโต อาวุโส โจเร ทิสฺวา ภยํ วา สารชฺชํ วา สธนสฺส โหติ อหมฺปน นิทฺธโน สฺวาหํ กึ ภายิสฺสามิ มยฺหํ หิ คาเมปิ อรญฺเญปิ วสนฺตสฺส ภยํ วา สารชฺชํ วา นตฺถีติ วตฺวา เตสํ ธมฺมํ เทเสนฺโต อิมํ คาถมาห

อสงฺกิโยมฺหิ คามมฺหิ อรญฺเญ นตฺถิ เม ภยํ

อุชุมคฺคํ สมารุฬฺโห เมตฺตาย กรุณาย จาติ ฯ

ตตฺถ อสงฺกิโยมฺหิ คามมฺหีติ สงฺกาย นิยุตฺโต ปติฏฺฐิโตติ สงฺกิโย น สงฺกิโย อสงฺกิโย อหํ คาเม วสนฺโตปิ สงฺกาย อปฺปติฏฺฐิตตฺตา อสงฺกิโย นิพฺภโย นิราสงฺโกติ ทีเปติ ฯ อรญฺเญติ คามคามูปจารวินิมุตฺตฏฺฐาเน ฯ อุชุมคฺคํ สมารุฬฺโห เมตฺตาย กรุณาย จาติ อหํ ติกจตุกฺกชฺฌานิกาหิ เมตฺตากรุณาหิ กายวงฺกาทิวิรหิตํ อุชุํ พฺรหฺมโลกคามิมคฺคํ อารุฬฺโหติ วทติ ฯ อถวา ฯ ปริสุทฺธสีลตาย กายวจีมโนวงฺกวิรหิตํ อุชุํ เทวโลกมคฺคํ อารุฬฺโหมฺหีติ ทสฺเสตฺวา ตโต อุตฺตรึ เมตฺตาย กรุณาย จ ปติฏฺฐิตตฺตา อุชุํ พฺรหฺมโลกมคฺคํ อารุฬฺโหมฺหีติ ทสฺเสติ ฯ อปริหีนชฺฌานสฺส หิ เอกนฺเตน พฺรหฺมโลกปรายนตฺตา เมตฺตากรุณาทโย อุชุมคฺคา นาม ฯ

เอวํ โพธิสตฺโต อิมาย คาถาย ธมฺมํ เทเสตฺวา ตุฏฺฐจิตฺเตหิ เตหิ มนุสฺเสหิ สกฺกโต ปูชิโต ยาวชีวํ จตฺตาโร พฺรหฺมวิหาเร ภาเวตฺวา พฺรหฺมโลเก นิพฺพตฺติ ฯ

สตฺถา อิมํ ธมฺมเทสนํ อาหริตฺวา อนุสนฺธึ ฆเฏตฺวา ชาตกํ สโมธาเนสิ ตทา สตฺถวาสิโน พุทฺธปริสา อเหสุํ ตาปโส ปน อหเมวาติ ฯ

อสงฺกิยชาตกํ ฉฏฺฐํ ฯ