๒. มิตตวินทชาดก

2. Mittavindajātakaṃ

atikkamma ramaṇakanti idaṃ satthā jetavane viharanto ekaṃ dubbacabhikkhuṃ ārabbha kathesi. Imassa pana jātakassa kassapasammā- sambuddhakālikaṃ vatthuṃ dasanipāte mahāmittavindajātake āvibhavissati. Tadā pana bodhisatto imaṃ gāthamāha

atikkamma ramaṇakaṃ sadāmattañca dūbhakaṃ

svāsi pāsāṇamāsīno yasmā jīvaṃ na mokkhasīti.

Tattha ramaṇakanti tasmiṃ kāle phalikassa nāmaṃ phalikappāsādañca atikkantosīti dīpeti. Sadāmattañcāti rajatassa nāmaṃ rajatappāsādañca atikkantosīti dīpeti. Dūbhakanti maṇino nāmaṃ maṇippāsādañca atikkantosīti dīpeti. Svāsīti so asi tvaṃ. Pāsāṇamāsīnoti uracakkaṃ nāma pāsāṇamayaṃ vā hoti maṇimayaṃ vā tampana pāsāṇamayaṃ so ca tena āsīno abhiniviṭṭho ajjhotthato tasmā pāsāṇe āsīnattā pāsāṇāsīnoti vattabbe byañjanasandhivasena makāraṃ ādāya pāsāṇamāsīnoti vuttaṃ. Pāsāṇaṃ vā āsīno taṃ uracakkaṃ āsajja pāpuṇitvā ṭhitoti attho. Yasmā jīvaṃ na mokkhasīti yamhā uracakkā yāva te pāpaṃ na khīyati tāva jīvantoyeva na muccissasi taṃ āsīnosīti.

Imaṃ gāthaṃ vatvā bodhisatto attano devaṭṭhānaṃyeva gato. Mittavindakopi uracakkaṃ ukkhipitvā mahādukkhaṃ anubhavamāno pāpakamme parikkhīṇe yathākammaṃ gato.

Satthā imaṃ dhammadesanaṃ āharitvā jātakaṃ samodhānesi tadā mittavindako dubbacabhikkhu ahosi devarājā pana ahameva sammāsambuddhoti.

Mittavindajātakaṃ dutiyaṃ.