สิกขาบทที่ ๔ เรื่องภิกษุณีฉัพพัคคีย์

{675} Catutthe. Avassutāti lokassādamittasanthavavasena kāyasaṃsaggarāgena avassutā. Dutiyapadepi eseva nayo. Purisapuggalassa hatthaggahaṇaṃ vātiādīsu pana yaṃ purisapuggalena hatthe gahaṇaṃ kataṃ taṃ purisapuggalassa hatthaggahaṇanti vuttaṃ. Eseva nayo saṅghāṭikaṇṇaggahaṇepi. Hatthaggahaṇanti ettha ca hatthaggahaṇañca aññaṃpi apārājikakkhette gahaṇañca ekajjhaṃ katvā hatthaggahaṇaṃ vuttanti Veditabbaṃ. Tenevassa padabhājane hatthaggahaṇaṃ vā sādiyeyyāti hattho nāma kupparaṃ upādāya yāva agganakhā etassa asaddhammassa paṭisevanatthāya ubbhakkhakaṃ adhojānumaṇḍalaṃ gahaṇaṃ sādiyati āpatti thullaccayassāti vuttaṃ. Ettha ca asaddhammoti kāyasaṃsaggo veditabbo na methunadhammo. Na hi methunassa sāmantā thullaccayaṃ hoti. Viññū paṭibalo kāyasaṃsaggaṃ samāpajjitunti vacanaṃpi cettha sādhakaṃ.

Tissitthiyo methunantaṃ na seve

tayo purise tayo ca anariyapaṇḍake na cācare

methunaṃ byañjanasmiṃ chejjaṃ siyā methunadhammapaccayā

pañhāmesā kusalehi cintitāti 1-

imāya parivāre vuttāya sedamocanagāthāya virujjhatīti ce. Na methunadhammassa pubbabhāgattā. Parivāreyeva hi methunadhammassa pubbabhāgo jānitabboti vaṇṇo avaṇṇo kāyasaṃsaggo duṭṭhullavācā attakāmapāricariyā vanamanuppadānanti evaṃ sukkavisaṭṭhiādīni pañca sikkhāpadāni methunadhammassa pubbabhāgoti vuttāni. Tasmā kāyasaṃsaggo methunadhammassa pubbabhāgattā paccayo hoti. Iti chejjaṃ siyā methunadhammapaccayāti ettha iminā pariyāyena attho veditabbo. Etenūpāyena sabbapadesu vinicchayo veditabbo. Apica saṅketaṃ vā gaccheyyāti etassa padabhājane itthannāmaṃ āgacchāti evaṃ nāmakaṃ ṭhānaṃ āgacchāti attho. {676} Aṭṭhamaṃ vatthuṃ paripūrentī assamaṇī

@Footnote: 1. vi. parivāra. 8/534-535. Hotīti anulomato vā paṭilomato vā ekantarikāya vā yena tena nayena aṭṭhamavatthuṃ paripūrentīyeva assamaṇī hoti. Yā pana ekaṃ vā vatthuṃ satta vā vatthūni sattakkhattuṃpi pūrentī neva assamaṇī hoti āpannā āpattiyo desetvā muccati. Apicettha gaṇanūpikā āpatti veditabbā. Vuttaṃ hetaṃ atthāpatti desitā gaṇanūpikā atthāpatti desitā na gaṇanūpikāti. Tatrāyaṃ vinicchayo idāni nāpajjissāmīti dhuranikkhepaṃ katvā desitā gaṇanūpikā desitagaṇanaṃ upeti pārājikassa aṅgaṃ na hoti. Tasmā yā ekaṃ āpannā dhuranikkhepaṃ katvā desetvā puna kilesavasena āpajjati puna deseti evaṃ aṭṭha vatthūni pūrentīpi pārājikā na hoti. Yā pana āpajjitvā punapi aññaṃ vatthuṃ āpajjissāmīti saussāhāva deseti tassā sā āpatti agaṇanūpikā desitāpi adesitāva hoti desitagaṇanaṃ na gacchati pārājikasseva aṅgaṃ hoti aṭṭhame vatthumhi paripuṇṇamatte pārājikā hoti. Sesaṃ uttānamevāti. Dhuranikkhepasamuṭṭhānaṃ kāyavācācittato samuṭṭhāti kiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ dvivedananti.

Catutthapārājikasikkhāpadaṃ samattaṃ vaṇṇanākkamenāti.

Uddiṭṭhā kho ayyāyo aṭṭha pārājikā dhammāti bhikkhū ārabbha paññattā sādhāraṇā cattāro ime ca cattāroti evaṃ pāṭimokkhuddesamattena uddiṭṭhā kho ayyāyo aṭṭha pārājikā Dhammāti evamettha attho daṭṭhabbo. Sesaṃ mahāvibhaṅge vuttanayamevāti.

Samantapāsādikāya vinayasaṃvaṇṇanāya bhikkhunīvibhaṅage pārājikakaṇḍavaṇṇanā niṭṭhitā.