โตเทยยมาณวกปัญหานิทเทส

9. Todeyyamāṇavasuttaniddesavaṇṇanā

Navame todeyyasutte:- vimokkho tassa kīdisoti tassa kīdiso vimokkho icchitabboti pucchati.

Idānissa aññavimokkhābhāvaṃ dassento bhagavā dutiyaṃ gāthamāha. Tattha vimokkho tassa nāparoti tassañño vimokkho natthi.

Evaṃ "taṇhakkhayo eva vimokkho"ti vuttepi tamatthaṃ asallakkhento "nirāsaso so uda āsasāno"ti puna pucchati. Tattha uda paññakappīti udāhu samāpattiñāṇādinā ñāṇena taṇhākappaṃ vā diṭṭhikappaṃ vā kappayati.

Athassa bhagavā taṃ ācikkhanto catutthaṃ gāthamāha. Tattha kāmabhaveti kāme ca bhave ca.

Rūpe nāsiṃsatīti catusamuṭṭhānike rūpārammaṇe chandarāgavasena na pattheti. Saddādīsupi eseva nayo. Palibodhaṭṭhena rāgo eva kiñcanaṃ rāgakiñcanaṃ madanaṭṭhena vā. Dosakiñcanādīsupi eseva nayo. Sesaṃ sabbattha pākaṭameva.

Evaṃ bhagavā idampi suttaṃ arahattanikūṭeneva desesi. Desanāpariyosāne ca pubbasadiso eva dhammābhisamayo ahosīti.

Saddhammappajjotikāya cūḷaniddesaṭṭhakathāya

todeyyamāṇavasuttaniddesavaṇṇanā niṭṭhitā.

Navamaṃ.