สุทธิกปฏิสัมภิทาญาณนิทเทส

64-67. Suddhikapaṭisambhidāñāṇaniddesavaṇṇanā

Suddhikapaṭisambhidāñāṇaniddese imesaṃ ñāṇānaṃ pabhedābhāvatoyeva heṭṭhā viya pabhedaṃ adassetvāyeva atthesu ñāṇaṃ atthapaṭisambhidātiādi vuttaṃ. Paññāpabhedābhāvepi attanā paṭividdhacatusaccadhammattavasena nānattasabhāvato atthanānatte paññā atthapaṭisambhidāñāṇantiādi vuttaṃ. Tattha nānatteti atthādīnaṃ anekabhāve. Vavatthāneti atthādīnaṃ nicchayane. Sallakkhaṇeti atthādīnaṃ sammādassane. Upalakkhaṇeti atthādīnaṃ bhusaṃ dassane. Pabhedeti atthādīnaṃ nānābhede. Pabhāvaneti atthādīnaṃ pākaṭakaraṇena uppādane. Jotaneti atthādīnaṃ dīpane. Virocaneti atthādīnaṃ vividhā dīpane. Pakāsaneti atthādīnaṃ pakāsane. "nānatte"ti mūlapadaṃ katvā sabbasādhāraṇavasena vuttaṃ. "vavatthāne"ti sotāpannassa vasena, "sallakkhaṇe upalakkhaṇe"ti sakadāgāmissa vasena, "pabhede pabhāvane"ti anāgāmissa vasena, "jotane virocane pakāsane"ti arahato vasena vuttanti evamettha yojanā kātabbāti.

Suddhikapaṭisambhidāñāṇaniddesavaṇṇanā niṭṭhitā.

Iti saddhammappakāsiniyā paṭisambhidāmaggaṭṭhakathāya

paṭhamo bhāgo