๑. มหาปริวารเถราปทาน (๑๑๑)

|๑๑๓.๑| วิปสฺสี นาม ภควา โลกเชฏฺโฐ นราสโภ อฏฺฐสฏฺฐิสหสฺเสหิ ปาวิสิ พนฺธุมํ ตทา ฯ |๑๑๓.๒| นครา อภินิกฺขมฺม อคมึ ทีปเจติยํ อทฺทสํ วิรชํ พุทฺธํ อาหุตีนํ ปฏิคฺคหํ ฯ |๑๑๓.๓| จุลฺลาสีติสหสฺสานิ ยกฺขา มยฺหํ อุปนฺติเก อุปฏฺฐหนฺติ สกฺกจฺจํ อินฺทํว ติทสา คณา ฯ |๑๑๓.๔| ภวนา อภินิกฺขมฺม ทุสฺสํ ปคฺคยฺหหํ ตทา สิรสา อภิวาเทสึ ตญฺจาทาสึ มเหสิโน ฯ |๑๑๓.๕| อโห พุทฺธา อโห ธมฺมา อโห โน สตฺถุสมฺปทา พุทฺธสฺส อานุภาเวน วสุธายํ ปกมฺปถ ฯ |๑๑๓.๖| ตญฺจ อจฺฉริยํ ทิสฺวา อพฺภูตํ โลมหํสนํ พุทฺเธ จิตฺตํ ปสาเทมิ ทิปทินฺทมฺหิ ตาทิเน ฯ |๑๑๓.๗| โสหํ จิตฺตํ ปสาเทตฺวา ทุสฺสํ ทตฺวาน สตฺถุโน สรณญฺจ อุปาคญฺฉึ สามจฺโจ สปริชฺชโน ฯ |๑๑๓.๘| เอกนวุเต อิโต กปฺเป ยํ กมฺมมกรึ ตทา ทุคฺคตึ นาภิชานามิ พุทฺธปูชายิทํ ผลํ ฯ |๑๑๓.๙| อิโต ปณฺณรเส กปฺเป โสฬสาสึสุ วาหนา สตฺตรตนสมฺปนฺนา จกฺกวตฺตี มหพฺพลา ฯ |๑๑๓.๑๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา มหาปริวาโร เถโร อิมา คาถาโย อภาสิตฺถาติ ฯ มหาปริวารตฺเถรสฺส อปทานํ สมตฺตํ ฯ