๕. สัมมุขาถวิกเถราปทาน (๑๒๕)

|127.41| Jāyamāne vipassamhi nimittaṃ byākariṃ ahaṃ nibbāpayaṃ ca janataṃ buddho loke bhavissati. |127.42| Yasmiṃ ca jāyamānasmiṃ dasasahassī pakampati sodāni bhagavā satthā dhammaṃ deseti cakkhumā. |127.43| Yasmiṃ ca jāyamānasmiṃ āloko vipulo ahu sodāni bhagavā satthā dhammaṃ deseti cakkhumā. |127.44| Yasmiṃ ca jāyamānasmiṃ saritāyo na sandisuṃ 1- sodāni bhagavā satthā dhammaṃ deseti cakkhumā. |127.45| Yasmiṃ ca jāyamānasmiṃ avīciggi na pajjali sodāni bhagavā satthā dhammaṃ deseti cakkhumā. |127.46| Yasmiṃ ca jāyamānasmiṃ pakkhisaṅgho na sañcari sodāni bhagavā satthā dhammaṃ deseti cakkhumā. |127.47| Yasmiñca jāyamānasmiṃ vātakkhandho na vāyati sodāni bhagavā satthā dhammaṃ deseti cakkhumā. @Footnote: 1 ma sandayuṃ. |127.48| Yasmiñca jāyamānasmiṃ sabbaratanāni jotisuṃ sodāni bhagavā satthā dhammaṃ deseti cakkhumā. |127.49| Yasmiñca jāyamānasmiṃ sattāsuṃ padavikkamā sodāni bhagavā satthā dhammaṃ deseti cakkhumā. |127.50| Jātamattova sambuddho disā sabbā vilokayi vācāsabhimudīresi esā buddhāna dhammatā. |127.51| Saṃvejayitvā janataṃ thavitvā lokanāyakaṃ sambuddhaṃ abhivāditvā pakkāmiṃ pācināmukho. |127.52| Ekanavute ito kappe yaṃ buddhamabhithomayiṃ duggatiṃ nābhijānāmi thomanāya idaṃ phalaṃ. |127.53| Ito navutikappamhi sammukhāthavikavhayo sattaratanasampanno cakkavatti mahabbalo. |127.54| Paṭhavīdundubhi nāma ekūnanavutimhito sattaratanasampanno cakkavatti mahabbalo. |127.55| Aṭṭhāsītimhito kappe obhāso nāma khattiyo sattaratanasampanno cakkavatti mahabbalo. |127.56| Sattāsītimhito kappe saritacchedanavhayo sattaratanasampanno cakkavatti mahabbalo. |127.57| Agginibbāpano nāma kappānaṃ chaḷasītiyā sattaratanasampanno cakkavatti mahabbalo. |127.58| Rājā vātasamo nāma kappānaṃ pañcasītiyā sattaratanasampanno cakkavatti mahabbalo. |127.59| Gatipacchedano nāma kappānaṃ cullasītiyā 1- sattaratanasampanno cakkavatti mahabbalo. |127.60| Ratanappajjalo nāma kappānaṃ te asītiyā sattaratanasampanno cakkavatti mahabbalo. |127.61| Padavikkamano nāma kappānaṃ dve asītiyā sattaratanasampanno cakkavatti mahabbalo. |127.62| Rājā vilokano nāma kappānaṃ ekasītiyā sattaratanasampanno cakkavatti mahabbalo. |127.63| Girisāroti 2- nāmena kappesītimhi khattiyo sattaratanasampanno cakkavatti mahabbalo. |127.64| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā sammukhāthaviko thero imā gāthāyo abhāsitthāti. Sammukhāthavikattherassa apadānaṃ samattaṃ. @Footnote: 1 Ma. pañcasītiyā. 2 Ma. girasāroti.