๗. ผลทายกเถราปทาน (๑๒๗)

|129.75| Ajjhāyiko mantadharo tiṇṇaṃ vedāna pāragū himavantassavidūre vasāmi assame ahaṃ. |129.76| Aggihuttañca me atthi puṇḍarīkaphalāni ca puṭake nikkhipitvāna dumagge laggitaṃ mayā. |129.77| Padumuttaro lokavidū āhutīnaṃ paṭiggaho mamuddharitukāmo so bhikkhanto mamupāgami. |129.78| Pasannacitto sumano phalaṃ buddhassadāsahaṃ pītisañjanano mayhaṃ diṭṭhadhamme sukhāvaho. |129.79| Suvaṇṇavaṇṇo sambuddho āhutīnaṃ paṭiggaho antalikkhe ṭhito satthā imaṃ gāthaṃ abhāsatha. |129.80| Iminā phaladānena cetanāpaṇidhīhi ca kappānaṃ satasahassaṃ duggatiṃ nūpapajjati. |129.81| Teneva sukkamūlena anubhutvāna sampadā pattomhi acalaṃ ṭhānaṃ hitvā jayaparājayaṃ. |129.82| Ito sattakappasate rājā āsiṃ sumaṅgalo sattaratanasampanno cakkavatti mahabbalo. |129.83| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā phaladāyako thero imā gāthāyo abhāsitthāti. Phaladāyakattherassa apadānaṃ samattaṃ.