๗. นิคคุณฑิปุปผิยเถราปทาน (๓๒๗)

|๓๒๙.๓๙| ยทา เทโว เทวกายา จวติ อายุสงฺขยา ตโย สทฺทา นิจฺฉรนฺติ เทวานํ อนุโมทตํ ฯ |๓๒๙.๔๐| อิโต โภ สุคตึ คจฺฉ มนุสฺสานํ สหพฺยตํ มนุสฺสภูโต สทฺธมฺเม ลภ สทฺธํ อนุตฺตรํ ฯ |๓๒๙.๔๑| สา เต สทฺธา นิวิฏฺฐสฺส มูลชาตา ปติฏฺฐิตา ยาวชีวํ อสํหิรา สทฺธมฺเม สุปเวทิเต ฯ |๓๒๙.๔๒| กาเยน กุสลํ กตฺวา วาจาย กุสลํ พหุํ มนสา กุสลํ กตฺวา อพฺยาปชฺฌํ นิรูปธึ ฯ |๓๒๙.๔๓| ตโต โอปธิกํ ปุญฺญํ กตฺวา ทาเนน ตํ พหุํ อญฺเญ ๑- ปวเร สทฺธมฺเม พฺรหฺมจริเย นิเวสย ฯ |๓๒๙.๔๔| อิมาย อนุกมฺปาย เทวเทวํ ยถา วิทู จวนฺตํ อนุโมทนฺติ เอหิ เทว ปุนปฺปุนํ ฯ |๓๒๙.๔๕| สํวิคฺโคหํ ๒- ตทา อาสึ เทวสงฺเฆ สมาคเต กํสุ นาม อหํ โยนึ คมิสฺสามิ อิโต จุโต ฯ |๓๒๙.๔๖| มม สํเวคมญฺญาย สมโณ ภาวิตินฺทฺริโย มมุทฺธริตุกาโม โส อาคจฺฉิ มม สนฺติกํ ฯ |๓๒๙.๔๗| สุมโน นาม นาเมน ปทุมุตฺตรสาวโก อตฺถธมฺมานุสาสิตฺวา สํเวเชสิ มมนฺตทา ฯ ทฺวาทสมํ ภาณวารํ ฯ |๓๒๙.๔๘| ตสฺสาหํ วจนํ สุตฺวา พุทฺเธ จิตฺตํ ปสาทยึ ฯ ตํ ธีรํ ๓- อภิวาเทตฺวา ตตฺถ กาลํ กโต อหํ ฯ |๓๒๙.๔๙| อุปปชฺชึ ๔- ส ตตฺเถว สุกฺกมูเลน โจทิโต วสนฺโต มาตุกุจฺฉิมฺหิ ปุน ธาเรตุ มาตุยา ฯ |๓๒๙.๕๐| ตมฺหา กายา จวิตฺวาน ติทเส อุปปชฺชหํ เอตฺถนฺตเร น ปสฺสามิ โทมนสฺสํ อหํ ตทา ฯ |๓๒๙.๕๑| ตาวตึสา จวิตฺวาน มาตุกุจฺฉึ สโมกฺกมึ นิกฺขมิตฺวาน กิจฺฉิมฺหา กิญฺจิ ๕- ทุกฺขํ อชานิหํ ฯ @เชิงอรรถ: ๑ ม. อญฺเญปิ มจฺเจ ... ฯ ยุ. อญฺเญ นิจฺเจว ... ฯ ๒ ม. สํเวโค เม ตทา อาสิ ฯ @ ๓ ยุ. วีรํ ฯ ๔ ยุ. อุปปชฺชิสฺสํ ฯ ๕ ม. ยุ. กณฺหสุกฺกํ อชานหํ ฯ |๓๒๙.๕๒| ชาติยา สตฺตวสฺเสน ๑- อารามํ ปาวิสึ อหํ โคตมสฺส ภควโต สกฺยปุตฺตสฺส ตาทิโน ฯ |๓๒๙.๕๓| วิตฺถาริเก ปาวจเน พาหุชญฺญมฺหิ สาสเน อทฺทสํ สาสนํ กาเร ภิกฺขโว ตตฺถ สตฺถุโน ฯ |๓๒๙.๕๔| สาวตฺถิ นาม นครํ ราชา ตตฺถาสิ โกสโล รเถน นาคยุตฺเตน อุเปสิ โพธิมุตฺตมํ ฯ |๓๒๙.๕๕| ตสฺสาหํ นาคํ ทิสฺวาน ปุพฺพกมฺมํ อนุสฺสรึ อญฺชลึ ปคฺคเหตฺวาน สมยํ อคมาสหํ ฯ |๓๒๙.๕๖| ชาติยา สตฺตวสฺโสว ปพฺพชึ อนคาริยํ โย โส พุทฺธํ อุปฏฺฐาสิ อานนฺโท นาม สาวโก ฯ |๓๒๙.๕๗| คติมา ธิติมา เจว สติมา จ พหุสฺสุโต รญฺโญ จิตฺตํ ปสาเทนฺโต นิยฺยาเทสิ มหาชุติ ฯ |๓๒๙.๕๘| ตสฺสาหํ ธมฺมํ สุตฺวาน ปุพฺพกมฺมํ อนุสฺสรึ ตตฺเถว ฐิตโก สนฺโต อรหตฺตํ อปาปุณึ ฯ |๓๒๙.๕๙| เอกํสํ จีวรํ กตฺวา สิเร กตฺวาน อญฺชลึ สมฺพุทฺธํ อภิวาเทตฺวา อิมํ วาจํ อุทีรยึ ฯ |๓๒๙.๖๐| ปทุมุตฺตรพุทฺธสฺส ทิปทินฺทสฺส ตาทิโน ๒- นิคุณฺฑิปุปฺผํ ปคฺคยฺห สีหาสเน ฐเปสหํ ฯ |๓๒๙.๖๑| เตน กมฺเมน ทิปทินฺท โลกเชฏฺฐ นราสภ ปตฺโตมฺหิ อจลํ ฐานํ หิตฺวา ชยปราชยํ ฯ @เชิงอรรถ: ๑ ม. สตฺตวสฺโสว ฯ ๒ ม. ยุ. สตฺถุโน ฯ |๓๒๙.๖๒| ปญฺจวีสสหสฺสมฺหิ กปฺปานํ มนุชาธิปา อพฺพุทนิรพฺพุทานิ อฏฺฐฏฺฐาสึสุ ขตฺติยา ฯ |๓๒๙.๖๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา นิคฺคุณฺฑิปุปฺผิโย เถโร อิมา คาถาโย อภาสิตฺถาติ ฯ นิคฺคุณฺฑิปุปฺผิยตฺเถรสฺส อปทานํ สมตฺตํ ฯ