๒. ตีณุปลมาลิยเถราปทาน (๓๔๒)

TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Dutiyaṃ tīṇuppalamāliyattherāpadānaṃ (342)

[344] |344.11| Candabhāgānadītīre ahosiṃ vānaro tadā addasaṃ virajaṃ buddhaṃ nisinnaṃ pabbatantare. |344.12| Obhāsentaṃ disā sabbā sālarājaṃva phullitaṃ lakkhaṇabyañjanūpetaṃ disvā attamano ahu. |344.13| Udaggacitto sumano pītiyā haṭṭhamānaso tīṇi uppalapupphāni matthake abhiropayiṃ. |344.14| Pupphāni abhiropetvā vipassissa mahesino sagāravo bhavitvāna 1- pakkāmiṃ uttarāmukho. |344.15| Gacchanto paṭikuṭiko vippasannena cetasā selantare papatitvā 2- pāpuṇiṃ jīvitakkhayaṃ. @Footnote: 1 Yu. gamitvāna. 2 Ma. Yu. patitvāna. |344.16| Tena kammena sukatena cetanāpaṇidhīhi ca jahitvā mānusaṃ dehaṃ tāvatiṃsaṃ agacchahaṃ. |344.17| Satānaṃ tīṇikkhattuñca devarajjamakārayiṃ satānaṃ pañcakkhattuñca cakkavatti ahosahaṃ. |344.18| Ekanavute ito kappe yaṃ pupphamabhipūjayiṃ duggatiṃ nābhijānāmi buddhapūjāyidaṃ phalaṃ. |344.19| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā tīṇuppalamāliyo thero imā gāthāyo abhāsitthāti. Tīṇuppalamāliyattherassa apadānaṃ samattaṃ.