๓. เมตตคูเถราปทาน (๔๐๓)

|๔๐๕.๔๕| หิมวนฺตสฺส อวิทูเร อโสโก นาม ปพฺพโต ตตฺถาปิ อสฺสโม มยฺหํ วิสุกมฺเมน ๑- มาปิโต ฯ |๔๐๕.๔๖| สุเมโธ นาม สมฺพุทฺโธ อคฺโค การุณิโก มุนิ นิวาสยิตฺวา ปุพฺพเณฺห ปิณฺฑาย เม อุปาคมิ ฯ |๔๐๕.๔๗| อุปาคตํ มหาวีรํ สุเมธํ โลกนายกํ ปคฺคยฺห สุคตปตฺตํ ๒- สปฺปิเตลํ อปูรยึ ฯ |๔๐๕.๔๘| ทตฺวานาหํ พุทฺธเสฏฺเฐ สุเมเธ โลกนายเก อญฺชลึ ปคฺคเหตฺวาน ภิยฺโย หาสํ ชเนสหํ ฯ |๔๐๕.๔๙| อิมินา สปฺปิทาเนน เจตนาปณิธีหิ จ เทวภูโต มนุสฺโส วา ลภามิ วิปุลํ สุขํ ฯ |๔๐๕.๕๐| วินิปาตํ วิวชฺเชตฺวา สํสรามิ ภวาภเว ตตฺถ จิตฺตํ ปณิธิตฺวา ลภามิ อจลํ ปทํ ฯ |๔๐๕.๕๑| ลาภา ตุยฺหํ สุลทฺธนฺเต ยํ มํ อทฺทกฺขิ พฺราหฺมณ ๓- มม ทสฺสนมาคมฺม อรหตฺตํ คมิสฺสติ ๔- ฯ |๔๐๕.๕๒| วิสฺสฏฺโฐ โหหิ มา ภายิ อธิคนฺตฺวา มหายสํ มมํ หิ สปฺปึ ทตฺวาน ปริโมกฺขาสิ ชาติยา ฯ |๔๐๕.๕๓| อิมินา สปฺปิทาเนน เจตนาปณิธีหิ จ เทวภูโต มนุสฺโส วา ลภามิ วิปุลํ สุขํ ฯ @เชิงอรรถ: ๑ ม. วิสกมฺเมน ฯ ๒ ยุ. สุภกํ ปตฺตํ ฯ ๓ ยุ. พฺราหฺมโณ ฯ @ ๔ ม. ภวิสฺสติ ฯ ยุ. ภวิสฺสสิ ฯ |๔๐๕.๕๔| อิมินา อธิกาเรน ๑- เมตฺตจิตฺตวตาย จ อฏฺฐารเส กปฺปสเต เทวโลเก รมิสฺสติ ๒- ฯ |๔๐๕.๕๕| อฏฺฐารส จ ติกฺขตฺตุํ เทวราชา ภวิสฺสติ ๓- ปเทสรชฺชํ วิปุลํ คณนาโต อสงฺขยํ ฯ |๔๐๕.๕๖| เอกปญฺญาสกฺขตฺตุญฺจ จกฺกวตฺติ ภวิสฺสติ จาตุรนฺโต วิชิตาวี ชมฺพูมณฺฑสฺส อิสฺสโร ฯ |๔๐๕.๕๗| มหาสมุทฺโท วกฺโขพฺโภ พุทฺธโร ปฐวี ยถา เอวเมว จ เม โภคา อปฺปเมยฺยา ภวิสฺสเร |๔๐๕.๕๘| สฏฺฐิโกฏึ หิรญฺญสฺส ทตฺวาน ๔- ปพฺพชึ อหํ ฯ กึ กุสลํ คเวสนฺโต พาวรึ อุปสงฺกมึ ฯ |๔๐๕.๕๙| ตตฺถ มนฺเต อธิยามิ ฉฬงฺคํ นาม ลกฺขณํ ตมนฺธการํ วิธมํ อุปฺปชฺชิ ตฺวํ มหามุนิ ฯ |๔๐๕.๖๐| ตว ทสฺสนกาโมหํ อาคโตมฺหิ มหามุนิ ตว ธมฺมํ สุณิตฺวาน ปตฺโตมฺหิ อจลํ ปทํ ฯ |๔๐๕.๖๑| ตึสกปฺปสหสฺสมฺหิ สปฺปึ พุทฺธสฺสทาสหํ เอตฺถนฺตเร นาภิชาเน สปฺปิ วิญฺญาปิตํ มยา ฯ |๔๐๕.๖๒| มม สงฺกปฺปมญฺญาย อุปฺปชฺชติ ยถิจฺฉกํ จิตฺตมญฺญาย นิพฺพตฺตํ สพฺเพ สนฺตปฺปยามหํ ฯ |๔๐๕.๖๓| อโห พุทฺธา อโห ธมฺมา อโห โน สตฺถุสมฺปทา โถกญฺหิ สปฺปึ ทตฺวาน อปฺปเมยฺยํ ลภามหํ ฯ @เชิงอรรถ: ๑ ม. สปฺปิทาเนน ฯ ๒ ม. ยุ. รมิสฺสสิ ฯ ๓ ม. ยุ. ภวิสฺสสิ ฯ อิโต ปรํ อีทิสเมว ฯ @ ๔ ม. จชิตฺวา ฯ |๔๐๕.๖๔| มหาสมุทฺเท อุทกํ ยาวตา เนรุปสฺสโต มม สปฺปึ อุปาทาย กลภาคํ น หิสฺสติ ฯ |๔๐๕.๖๕| ยาวตา จกฺกวาฬสฺส การยนฺตสฺส ราสิโต มม นิพฺพตฺตวตฺถานํ โอกาโส โส น สมฺมติ ฯ |๔๐๕.๖๖| ปพฺพตราชา หิมวา ปวโรปิ สิลุจฺจโย มมานุลิตฺตคนฺธสฺส อุปนิธํ ๑- น หิสฺสติ ฯ |๔๐๕.๖๗| วตฺถํ คนฺธญฺจ สปฺปิญฺจ อญฺญํ วา ทิฏฺฐธมฺมิกํ อสงฺขตญฺจ นิพฺพานํ สปฺปิทานสฺสิทํ ผลํ ฯ |๔๐๕.๖๘| สติปฏฺฐานสยโน สมาธิฌานโคจโร โพชฺฌงฺคชนโน ๒- อชฺช สปฺปิทานสฺสิทํ ผลํ ฯ |๔๐๕.๖๙| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๔๐๕.๗๐| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๐๕.๗๑| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เมตฺตคู เถโร อิมา คาถาโย อภาสิตฺถาติ ฯ เมตฺตคุตฺเถรสฺส อปทานํ สมตฺตํ ฯ @เชิงอรรถ: ๑ ม. อุปนิธึ ฯ ยุ. อุปนิยํ ฯ ๒ ม. ยุ. โพชฺฌงฺคโภชโน ฯ