๒. สตรังสิยเถราปทาน (๕๒)

[๕๔] |๕๔.๘| อุพฺพิทฺธํ เสลมารุยฺห นิสีทิ ปุริสุตฺตโม ปพฺพตสฺสาวิทูรมฺหิ พฺราหฺมโณ มนฺตปารคู ฯ |๕๔.๙| อุปวิฏฺฐํ มหาวีรํ เทวเทวํ นราสภํ อญฺชลึ ปคฺคเหตฺวาน สนฺถวึ โลกนายกํ ฯ |๕๔.๑๐| เอส พุทฺโธ มหาวีโร วรธมฺมปฺปกาสโก ชลติ อคฺคิกฺขนฺโธว ภิกฺขุสงฺฆปุรกฺขโต ฯ |๕๔.๑๑| มหาสมุทฺโทวกฺโขพฺโภ อณฺณโวว ทุรุตฺตโร มิคราชาวสมฺภีโต ธมฺมํ เทเสติ จกฺขุมา ฯ |๕๔.๑๒| มม สงฺกปฺปมญฺญาย ปทุมุตฺตรนามโก ๑- ภิกฺขุสงฺเฆ ฐิโต สตฺถา อิมา คาถา อภาสถ ฯ |๕๔.๑๓| เยนายํ อญฺชลิ ทินฺโน พุทฺธเสฏฺโฐ จ โถมิโต ตึสกปฺปสหสฺสานิ เทวรชฺชํ กริสฺสติ ฯ |๕๔.๑๔| กปฺปสตสหสฺสมฺหิ องฺคีรสสนามโก วิวฏฺฏจฺฉโท สมฺพุทฺโธ อุปฺปชฺชิสฺสติ ตาวเท ฯ |๕๔.๑๕| ตสฺส ธมฺเมสุ ทายาโท โอรโส ธมฺมนิมฺมิโต สตรํสีติ นาเมน อรหา โส ภวิสฺสติ ฯ |๕๔.๑๖| ชาติยา สตฺตวสฺโสหํ ปพฺพชึ อนคาริยํ สตรํสิมฺหิ นาเมน ปภา นิทฺธาวเต มม ฯ |๕๔.๑๗| มณฺฑเป รุกฺขมูเล วา ฌายี ฌานรโต อหํ ธาเรมิ อนฺติมํ เทหํ สมฺมาสมฺพุทฺธสาสเน ฯ |๕๔.๑๘| สฏฺฐิกปฺปสหสฺสมฺหิ จตุโร โรมนามกา ๒- สตฺตรตนสมฺปนฺนา จกฺกวตฺตี มหพฺพลา ฯ |๕๔.๑๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ @เชิงอรรถ: ๑ ม. ยุ. ปทุมุตฺตรนายโก ฯ ๒ ม. รามนามกา ฯ อิตฺถํ สุทํ อายสฺมา สตรํสิโย ๑- เถโร อิมา คาถาโย อภาสิตฺถาติ ฯ สตรํสิยตฺเถรสฺส อปทานํ สมตฺตํ ฯ