๒. กิสาโคตมีเถริยาปทาน

TIPITAKA Volume 33 : PALI ROMAN Sutta Pitaka Vol 25 : Sutta. Khu. Apa(2) Buddhavaṃso Cariyāpiṭakaṃ Dutiyaṃ kisāgotamītheriyāpadānaṃ (22)

[162] |162.55| Padumuttaro nāma jino sabbadhammāna pāragū ito satasahassamhi kappe uppajji nāyako. @Footnote: 1 Yu. yassa catthāya. ito paraṃ īdisameva. 2 Ma. Yu. sabbattha vimalaṃ. |162.56| Tadāhaṃ haṃsavatiyaṃ jātā aññatare kule upetvā taṃ naravaraṃ saraṇaṃ samupāgamiṃ. |162.57| Dhammañca tassa assosiṃ catusaccūpasañhitaṃ madhuraṃ paramassādaṃ cittasantisukhāvahaṃ 1- . |162.58| Tadāpi 2- bhikkhuniṃ dhīro lūkhacīvaradhārikaṃ 3- ṭhapento etadaggamhi vaṇṇayi purisuttamo. |162.59| Janetvānappakaṃ pītiṃ sutvā bhikkhuniyā guṇaṃ 4- kāraṃ katvāna buddhassa yathāsatti 5- yathābalaṃ. |162.60| Nipacca munidhīrantaṃ taṃ ṭhānaṃ abhipatthayiṃ tadānumodi sambuddho ṭhānalābhāya nāyako. |162.61| Satasahasse ito kappe okkākakulasambhavo gotamo nāma nāmena satthā loke bhavissati. |162.62| Tassa dhammesu dāyādā orasā dhammanimmitā kisāgotami nāma nāmena hessati satthusāvikā. |162.63| Taṃ sutvā muditā hutvā yāvajīvaṃ tadā jinaṃ mettacittā paricariṃ paccayehi vināyakaṃ. |162.64| Tehi 6- kammehi sukatehi cetanāpaṇidhīhi ca jahitvā mānusaṃ dehaṃ tāvatiṃsaṃ agañchahaṃ. |162.65| Imamhi bhaddake kappe brahmabandhu mahāyaso kassapo nāma nāmena uppajji vadataṃ varo. @Footnote: 1 Ma. vaṭṭasantisukhāvahaṃ. 2 Ma. tadā ca. Yu. kadāci. 3 Ma. ...dhāriniṃ. @ 4 Ma. guṇe. 5 Yu. yathāsattiṃ. 6 Ma. Yu. tena kammena sūkatena. |162.66| Upaṭṭhāko mahesissa tadā āsi narissaro kāsirājā kikī nāma bārāṇasipuruttame. |162.67| Pañcamī tassa dhītāhaṃ 1- dhammā nāmena vissutā dhammaṃ sutvā jinaggassa pabbajjaṃ samarocayiṃ. |162.68| Anujāni na no tāto agāreva tadā mayaṃ vīsavassasahassāni vicarimha atanditā. |162.69| Komāribrahmacariyaṃ rājakaññā sukhe ṭhitā buddhopaṭṭhānaniratā muditā satta dhītaro. |162.70| Samaṇī samaṇaguttā ca bhikkhunī bhikkhudāsikā dhammā ceva sudhammā ca sattamī saṅghadāsikā. |162.71| Khemā uppalavaṇṇā ca paṭācārā ca kuṇḍalā ahañca dhammadinnā ca visākhā hoti sattamī. |162.72| Tehi kammehi sukatehi cetanāpaṇidhīhi ca jahitvā mānusaṃ dehaṃ tāvatiṃsaṃ agañchahaṃ. |162.73| Pacchime ca bhave dāni jātā seṭṭhikule ahaṃ duggate adhane nīce 2- gatā ca sadhanaṃ kulaṃ. |162.74| Patiṭṭhapetvāna 3- sesā me dissanti 4- adhanā iti yadā ca pasutā 5- āsiṃ sabbesaṃ dayitā tadā. |162.75| Yadā so taruṇo putto 6- komārako 7- sukheṭṭhito sapāṇamiva kanto me tadā 8- yamavasaṃ gato. @Footnote: 1 Ma. Yu. dhītāsiṃ. 2 Ma. naṭṭhe. Yu. niṭṭhe. 3 Ma. Yu. patiṃ ṭhapetvā. @ 4 Ma. dessanti. 5 Yu. sasutā. 6 Ma. Yu. bhaddo. 7 Ma. komalako. @Yu. komalaṅgo. 8 Yu. tadāyaṃ parasaṅgato. |162.76| Sokaṭṭā dinavadanā assunettā rudamukhā mataṃ 1- kuṇapamādāya vilapantī gamāmahaṃ. |162.77| Tadā ekena sandiṭṭhā upetvā bhisakkuttamaṃ 2- avocaṃ dehi bhesajjaṃ puttasañjīvananti bho. |162.78| Na vijjante matā yasmiṃ gehe siddhatthakaṃ tato āharāti jino āha vinayopāyakovido. |162.79| Tadā gamitvā sāvatthiṃ na 3- labhiṃ tādisaṃ gharaṃ kuto siddhatthakaṃ tasmā tato laddhā satiṃ ahaṃ. |162.80| Kuṇapaṃ chaḍḍayitvāna upesiṃ lokanāyakaṃ dūrato ca 4- mamaṃ disvā avoca madhurassaro. |162.81| Yo ca vassasataṃ jīve apassaṃ udayabbayaṃ ekāhaṃ jīvitaṃ seyyo passato udayabbayaṃ. |162.82| Na gāmadhammo nigamassa dhammo na cāpiyaṃ ekakulassa dhammo sabbassa lokassa sadevakassa esova 5- dhammo yadidaṃ aniccatā. |162.83| Sāhaṃ 6- sutvānimā gāthā dhammacakkhuṃ visodhayiṃ tato viññātasaddhammā pabbajiṃ anagāriyaṃ. |162.84| Tathāpi pabbajitā santī yuñjantī jinasāsane na cireneva kālena arahattaṃ apāpuṇiṃ. @Footnote: 1 Yu. evaṃ. 2 Yu. bhisamuttamaṃ. 3 Yu. na labhitvādisaṃ gharaṃ. 4 Ma. Yu. va. @ 5 Ma. eseva. 6 Yu. sahā sutvānimā gāthā. |162.85| Iddhīsu ca vasī homi dibbāya sotadhātuyā paracittāni jānāmi satthusāsanakārikā. |162.86| Pubbenivāsaṃ jānāmi dibbacakkhuṃ visodhitaṃ khepetvā āsave sabbe visuddhāsiṃ sunimmalā. |162.87| Pariciṇṇo mayā satthā kataṃ buddhassa sāsanaṃ ohito garuko bhāro bhavanetti samūhatā. |162.88| Yassatthāya pabbajitā agārasmā anagāriyaṃ so me attho anuppatto sabbasaṃyojanakkhayo. |162.89| Atthadhammaniruttīsu paṭibhāṇe tatheva ca jhānaṃ me vipulaṃ suddhaṃ buddhaseṭṭhassa vāhasā. |162.90| Saṅkārakūṭā āharitvā susānā rathiyāpica tato saṅghāṭikaṃ katvā lūkhaṃ dhāremi cīvaraṃ. |162.91| Jino tasmiṃ guṇe tuṭṭho lūkhacīvaradhāraṇe ṭhapesi etadaggamhi parisāsu vināyako. |162.92| Kilesā jhāpitā mayhaṃ bhavā sabbe samūhatā nāgīva bandhanaṃ chetvā viharāmi anāsavā. |162.93| Svāgataṃ vata me āsi buddhaseṭṭhassa santike tisso vijjā anuppattā kataṃ buddhassa sāsanaṃ. |162.94| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ kisāgotamī bhikkhunī imā gāthāyo abhāsitthāti. Kisāgotamītheriyā apadānaṃ samattaṃ.