๑๗. ติสสพุทธวงศ์

TIPITAKA Volume 33 : PALI ROMAN Sutta Pitaka Vol 25 : Sutta. Khu. Apa(2) Buddhavaṃso Cariyāpiṭakaṃ Sattarasamo tissabuddhavaṃso

[18] |18.1| Siddhatthassa aparena asamo appaṭipuggalo anantasīlo 1- amitayaso tisso lokagganāyako. |18.2| Tamandhakāraṃ vidhamitvā obhāsetvā sadevakaṃ anukampako mahāvīro loke uppajji cakkhumā. |18.3| Tassāpi atulā iddhi atulā 2- sīlasamādhiyo sabbattha pāramiṃ gantvā dhammacakkaṃ pavattayi. |18.4| So buddho dasasahassamhi viññāpesi giraṃ suciṃ koṭisatāni 3- abhisamiṃsu paṭhame dhammadesane. |18.5| Dutiyo navutikoṭīnaṃ tatiye 4- saṭṭhikoṭiyo bandhanāto 5- pamocesi sampatte 6- naramarū tadā. |18.6| Sannipātā tayo āsuṃ tissassa 7- ca mahesino khīṇāsavānaṃ vimalānaṃ santacittāna tādinaṃ. |18.7| Khīṇāsavasatasahassānaṃ paṭhamo āsi samāgamo navutisatasahassānaṃ dutiyo āsi samāgamo. @Footnote: 1 Ma. anantatejo. 2 Ma. atulaṃ sīlaṃ samādhi ca. Yu. atulasīlasamādhī ca. @ 3 Yu. koṭisatasahassāni samiṃs. 4 Ma. tatiyo. 5 Yu. bandhanā so. @ 6 Ma. satte --. 7 Ma. Yu. tisse lokagganāyake. |18.8| Asītisatasahassānaṃ tatiyo āsi samāgamo khīṇāsavānaṃ vimalānaṃ pupphitānaṃ vimuttiyā. |18.9| Ahantena samayena sujāto nāma khattiyo mahābhogaṃ chaḍḍayitvā pabbajiṃ isipabbajjaṃ. |18.10| Mayi pabbajite sante uppajji lokanāyako buddhoti saddaṃ sutvāna pīti me upapajjatha. |18.11| Dibbaṃ mandāravaṃ pupphaṃ padumaṃ pārichattakaṃ ubho hatthehi paggayha dhunamāno upāgamiṃ. |18.12| Pātuvaṇṇaparivutaṃ tissaṃ lokagganāyakaṃ tamahaṃ pupphaṃ gahetvāna matthake dhāraye 1- jinaṃ. |18.13| Sopi maṃ tadā 2- byākāsi janamajjhe nisīdiya dvānavute ito kappe ayaṃ buddho bhavissati. |18.14| Ahu kapilavhayā rammā nikkhamitvā tathāgato padhānaṃ padahitvāna katvā dukkarakārikaṃ. |18.15| Ajapālarukkhamūlasmiṃ nisīditvā tathāgato tattha pāyāsaṃ paggayha nerañjaramupehiti. |18.16| Nerañjarāya tīramhi pāyāsaṃ adi so jino paṭiyattavaramaggena bodhimūlamhi ehiti. |18.17| Tato padakkhiṇaṃ katvā bodhimaṇḍaṃ anuttaraṃ assattharukkhamūlamhi bujjhissati mahāyaso. @Footnote: 1 Ma. Yu. dhārayiṃ. 2 Ma. Yu. buddho. ito paraṃ īdisameva. |18.18| Imassa janikā mātā māyā nāma bhavissati pitā suddhodano nāma ayaṃ hessati gotamo. |18.19| Kolito upatisso ca aggā hessanti sāvakā anāsavā vītarāgā santacittā samāhitā ānando nāmupaṭṭhāko upaṭṭhissatimaṃ jinaṃ. |18.20| Khemā uppalavaṇṇā ca aggā hessanti sāvikā anāsavā vītarāgā santacittā samāhitā. |18.21| Bodhi tassa bhagavato assatthoti pavuccati citto ca hatthāḷavako aggā hessantupaṭṭhakā. |18.22| Nandamātā ca uttarā aggā hessantupaṭṭhikā āyu vassasataṃ tassa gotamassa yasassino. |18.23| Idaṃ sutvāna vacanaṃ asamassa mahesino āmoditā naramarū buddhavījaṅkuro ayaṃ. |18.24| Ukkuṭṭhisaddā vattanti apphoṭenti hasanti ca katañjalī namassanti dasasahassī sadevakā. |18.25| Yadimassa lokanāthassa virajjhissāma sāsanaṃ anāgatamhi addhāne hessāma sammukhā imaṃ. |18.26| Yathā manussā nadiṃ tarantā paṭititthaṃ virajjhiya heṭṭhātitthaṃ gahetvāna uttaranti mahānadiṃ. |18.27| Evameva mayaṃ sabbe yadi muñcāmimaṃ jinaṃ anāgatamhi addhāne hessāma sammukhā imaṃ. |18.28| Tassāpi vacanaṃ sutvā bhiyyo cittaṃ pasādayiṃ uttariṃ vattamadhiṭṭhāsiṃ dasapāramipūriyā. |18.29| Khemakaṃ nāma nagaraṃ janasando 1- nāma khattiyo padumā nāma janikā tissassa ca mahesino. |18.30| Sattavassasahassāni agāraṃ ajjhāvasi so guṇaselānādiyanisabho 2- tayo pāsādamuttamā. |18.31| Samatiṃsasahassāni nāriyo samalaṅkatā subhaddā nāma 3- sā nārī ānando nāma atrajo. |18.32| Nimitte caturo disvā assayānena nikkhami anūnakaṃ 4- aḍḍhamāsaṃ padhānaṃ padahī jino. |18.33| Brahmunā yācito santo tisso lokagganāyako vattacakko mahāvīro yasavatīdāyamuttame 5- . |18.34| Brahmadevo ca udayo ca ahesuṃ aggasāvakā samago 6- nāmupaṭṭhāko tissassa ca mahesino. |18.35| Phussā ceva sudattā ca ahesuṃ aggasāvikā bodhi tassa bhagavato asanoti pavuccati. |18.36| Sambalo ca siri ceva ahesuṃ aggupaṭṭhakā kīsāgotamī upasenā ahesuṃ aggupaṭṭhikā. @Footnote: 1 Ma. Yu. janasandho. 2 Ma. guhaselanārisayanisabhā. Yu. ghaselanārīnisabhā. @ 3 Ma. nāmikā. 4 Ma. anūnaaṭṭhamāsāni. Yu. anūnakaṃ aṭṭhamāsaṃ. 5 Ma. @Yu. yasavatīyamuttame. 6 Ma. Yu. samaṅgo. Sopi buddho saṭṭhiratano ahu uccattane jino anūpamo asadiso himavā viya dissati. |18.37| Tassāpi atulatejassa āyu āsi anuttaro vassasatasahassāni loke aṭṭhāsi cakkhumā. |18.38| Uttamaṃ pavaraṃ seṭṭhaṃ anubhotvā mahāyasaṃ jalitvā aggikkhandhova nibbuto so sasāvako. |18.39| Valāhakova anilena suriyena viya ussavo andhakārova dīpena 1- nibbuto so sasāvako. |18.40| Tisso jinavaro buddho nandārāmamhi nibbuto tattheva tassa jinathūpo tīṇi yojanasamussitoti. Tissabuddhavaṃso sattarasamo.