๘. ปาทปิฐิยเถราปทาน

|38.50| Sumedho nāma sambuddho kāruṇiko 1- mahāmuni tārayitvā bahū satte nibbuto so mahāyaso. |38.51| Sīhāsanassa sāmantā sumedhassa mahesino pasannacitto sumano pādapīṭhamakārayiṃ. |38.52| Katvāna kusalaṃ kammaṃ sukhapākaṃ sukhudrayaṃ 2- puññakammena saṃyutto tāvatiṃsaṃ agañchahaṃ. @Footnote: 1 Ma. Yu. aggo kāruṇiko muni. 2 Yu. sukhindriyaṃ. |38.53| Tattha me vasamānassa puññakammasamaṅgino padāni uddharantassa soṇṇapīṭhā bhavanti me. |38.54| Lābhā tesaṃ suladdhante ye labhanti upassuti 1- nibbute kāraṃ katvāna labhanti vipulaṃ sukhaṃ. |38.55| Mayāpi sukataṃ kammaṃ vāṇijje supayojitaṃ pādapīṭhaṃ karitvāna soṇṇapīṭhaṃ labhāmahaṃ. |38.56| Yaṃ yaṃ disaṃ pakkamāmi kenaci kiccayenahaṃ 2- soṇṇapīṭhe akkamāmi puññakammassidaṃ phalaṃ. |38.57| Tiṃsakappasahassamhi yaṃ kammamakariṃ tadā duggatiṃ nābhijānāmi pādapīṭhassidaṃ phalaṃ. |38.58| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. Tisso vijjā anuppattā kataṃ buddhassa sāsanaṃ. |38.59| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā pādapīṭhiyo thero imā gāthāyo abhāsitthāti. Pādapīṭhiyattherassa apadānaṃ samattaṃ. @Footnote: 1 Ma. Yu. upassutiṃ. 2 Yu. paccayenahaṃ.