ติกมาติกา

[๙] ตโย ปุคฺคลา ฯ นิราโส อาสํโส วิคตาโส ฯ ตโย คิลานูปมา ปุคฺคลา ฯ กายสกฺขี ทิฏฺฐิปฺปตฺโต สทฺธาวิมุตฺโต ฯ คูถภาณี ปุปฺผภาณี มธุภาณี ฯ อรุกูปมจิตฺโต ปุคฺคโล วิชฺชูปมจิตฺโต ปุคฺคโล วชิรูปมจิตฺโต ปุคฺคโล ฯ อนฺโธ เอกจกฺขุ ทฺวิจกฺขุ ฯ อวกุชฺชปญฺโญ ปุคฺคโล อุจฺจงฺคปญฺโญ ปุคฺคโล ปุถุปญฺโญ ปุคฺคโล ฯ อตฺเถกจฺโจ ปุคฺคโล กาเมสุ จ ภเวสุ จ อวีตราโค อตฺเถกจฺโจ ปุคฺคโล กาเมสุ วีตราโค ภเวสุ อวีตราโค อตฺเถกจฺโจ ปุคฺคโล กาเมสุ จ ภเวสุ จ วีตราโค ฯ ปาสาณเลขูปโม ปุคฺคโล ปฐวีเลขูปโม ปุคฺคโล อุทกเลขูปโม ปุคฺคโล ฯ ตโย โปตฺถกูปมา ปุคฺคลา ฯ ตโย กาสิกวตฺถูปมา ปุคฺคลา ฯ สุปฺปเมยฺโย ทุปฺปเมยฺโย อปฺปเมยฺโย ฯ อตฺเถกจฺโจ ปุคฺคโล น เสวิตพฺโพ น ภชิตพฺโพ น ปยิรุปาสิตพฺโพ อตฺเถกจฺโจ ปุคฺคโล เสวิตพฺโพ ภชิตพฺโพ ปยิรุปาสิตพฺโพ อตฺเถกจฺโจ ปุคฺคโล สกฺกตฺวา ครุกตฺวา เสวิตพฺโพ ภชิตพฺโพ ปยิรุปาสิตพฺโพ ฯ อตฺเถกจฺโจ ปุคฺคโล ชิคุจฺฉิตพฺโพ น เสวิตพฺโพ น ภชิตพฺโพ น ปยิรุปาสิตพฺโพ อตฺเถกจฺโจ ปุคฺคโล อชฺฌุเปกฺขิตพฺโพ น เสวิตพฺโพ น ภชิตพฺโพ น ปยิรุปาสิตพฺโพ อตฺเถกจฺโจ ปุคฺคโล เสวิตพฺโพ ภชิตพฺโพ ปยิรุปาสิตพฺโพ ฯ อตฺเถกจฺโจ ปุคฺคโล สีเลสุ ปริปูรีการี สมาธิสฺมึ มตฺตโสการี ปญฺญาย มตฺตโสการี อตฺเถกจฺโจ ปุคฺคโล สีเลสุ จ ปริปูรีการี สมาธิสฺมึ จ ปริปูรีการี ปญฺญาย มตฺตโสการี อตฺเถกจฺโจ ปุคฺคโล สีเลสุ จ ปริปูรีการี สมาธิสฺมึ จ ปริปูรีการี ปญฺญาย จ ปริปูรีการี ฯ ตโย สตฺถาโร อปเรปิ ตโย สตฺถาโร ฯ ติกมาติกา นิฏฺฐิตา ฯ จตุกฺกมาติกา