กัปปัฏฐกถา

[๑๕๑๓] กปฺปฏฺโฐ กปฺปํ ติฏฺเฐยฺยาติ ฯ อามนฺตา ฯ กปฺโป จ สณฺฐาติ พุทฺโธ จ โลเก อุปฺปชฺชตีติ ฯ น เหวํ วตฺตพฺเพ ฯเปฯ กปฺปฏฺโฐ กปฺปํ ติฏฺเฐยฺยาติ ฯ อามนฺตา ฯ กปฺโป จ สณฺฐาติ สงฺโฆ จ ภิชฺชตีติ ฯ น เหวํ วตฺตพฺเพ ฯเปฯ กปฺปฏฺโฐ กปฺปํ ติฏฺเฐยฺยาติ ฯ อามนฺตา ฯ กปฺโป จ สณฺฐาติ กปฺปฏฺโฐ จ กปฺปฏฺฐิยํ กมฺมํ กโรตีติ ฯ น เหวํ วตฺตพฺเพ ฯเปฯ กปฺปฏฺโฐ กปฺปํ ติฏฺเฐยฺยาติ ฯ อามนฺตา ฯ กปฺโป จ สณฺฐาติ กปฺปฏฺโฐ จ ปุคฺคโล กาลํ กโรตีติ ฯ น เหวํ วตฺตพฺเพ ฯเปฯ กปฺปฏฺโฐ กปฺปํ ติฏฺเฐยฺยาติ ฯ อามนฺตา ฯ อตีตํ กปฺปํ ติฏฺเฐยฺย อนาคตํ กปฺปํ ติฏฺเฐยฺยาติ ฯ น เหวํ วตฺตพฺเพ ฯเปฯ กปฺปฏฺโฐ กปฺปํ ติฏฺเฐยฺยาติ ฯ อามนฺตา ฯ เทฺว กปฺเป ติฏฺเฐยฺย ตโย กปฺเป ติฏฺเฐยฺย จตฺตาโร กปฺเป ติฏฺเฐยฺยาติ ฯ น เหวํ วตฺตพฺเพ ฯเปฯ กปฺปฏฺโฐ กปฺปํ ติฏฺเฐยฺยาติ ฯ อามนฺตา ฯ กปฺปฏฺโฐ กปฺเป ฑยฺหนฺเต กตฺถ คจฺฉตีติ ฯ อญฺญํ โลกธาตุํ คจฺฉตีติ ฯ มโต คจฺฉติ เวหาสํ คจฺฉตีติ ฯ มโต คจฺฉตีติ ฯ กปฺปฏฺฐิยํ กมฺมํ อปราปริยเวปกฺกนฺติ ฯ น เหวํ วตฺตพฺเพ ฯเปฯ เวหาสํ คจฺฉตีติ ฯ อามนฺตา ฯ กปฺปฏฺโฐ อิทฺธิมาติ ฯ น เหวํ วตฺตพฺเพ ฯเปฯ กปฺปฏฺโฐ อิทฺธิมาติ ฯ อามนฺตา ฯ กปฺปฏฺเฐน ฉนฺทิทฺธิปาโท ภาวิโต วิริยิทฺธิปาโท ภาวิโต จิตฺติทฺธิปาโท ภาวิโต วีมํสิทฺธิปาโท ภาวิโตติ ฯ น เหวํ วตฺตพฺเพ ฯเปฯ

[๑๕๑๔] น วตฺตพฺพํ กปฺปฏฺโฐ กปฺปํ ติฏฺเฐยฺยาติ ฯ อามนฺตา ฯ นนุ วุตฺตํ ภควตา อาปายิโก เนรยิโก กปฺปฏฺโฐ สงฺฆเภทโก วคฺครโต อธมฺมฏฺโฐ โยคกฺเขมา ปธํสติ สงฺฆํ สมคฺคํ เภตฺวาน กปฺปํ นิรยมฺหิ ปจฺจตีติ ๑ อตฺเถว สุตฺตนฺโตติ ฯ อามนฺตา ฯ เตน หิ กปฺปฏฺโฐ กปฺปํ ติฏฺเฐยฺยาติ ฯ กปฺปฏฺฐกถา ฯ ________________ กุสลจิตฺตปฏิลาภกถา