นวัตตัพพัง สังโฆ ภุญชตีติกถา

8. Navattabbaṃsaṃghobhuñjatītikathāvaṇṇanā

[795-796] Idāni na vattabbaṃ saṃgho bhuñjatītikathā nāma hoti. Tatrāpi "maggaphalāneva saṃgho nāma, na ca tāni kiñci bhuñjanti, tasmā na vattabbaṃ saṃgho bhuñjati, pivati, khādati, sāyatī"ti yesaṃ laddhi seyyathāpi tesaññeva, te sandhāya pucchā sakavādissa, paṭiññā itarassa. Atha naṃ "yadi te saṃgho na bhuñjeyya, saṃghabhattādikaraṇaṃ niratthakaṃ bhaveyyā"ti codetuṃ nanu atthi keci saṃghabhattāni karontītiādimāha. Gaṇabhojanantiādi "yadi saṃgho na bhuñjeyya, kassa gaṇabhojanādīni siyun"ti codanatthaṃ vuttaṃ. Aṭṭha pānānīti idaṃ 1- "yadi saṃgho na piveyya, kassetāni pānāni satthā anujāneyyā"ti codanatthaṃ vuttaṃ. Sesamidampi 2- heṭṭhā vuttanayeneva veditabbanti.

Navattabbaṃsaṃghobhuñjatītikathāvaṇṇanā niṭṭhitā.