นวัตตัพพัง สังโฆ ภุญชตีติกถา

[๑๗๑๘] น วตฺตพฺพํ สงฺโฆ ภุญฺชติ ปิวติ ขาทติ สายตีติ ฯ อามนฺตา ฯ นนุ อตฺถิ เกจิ สงฺฆภตฺตานิ กโรนฺติ อุทฺเทสภตฺตานิ กโรนฺติ ยาคุปานานิ กโรนฺตีติ ฯ อามนฺตา ฯ หญฺจิ อตฺถิ เกจิ สงฺฆภตฺตานิ กโรนฺติ อุทฺเทสภตฺตานิ กโรนฺติ ยาคุปานานิ กโรนฺติ เตน วต เร วตฺตพฺเพ สงฺโฆ ภุญฺชติ ปิวติ ขาทติ สายตีติ ฯ

[๑๗๑๙] น วตฺตพฺพํ สงฺโฆ ภุญฺชติ ปิวติ ขาทติ สายตีติ ฯ อามนฺตา ฯ นนุ วุตฺตํ ภควตา คณโภชนํ ปรมฺปรโภชนํ อติริตฺตโภชนํ อนติริตฺตโภชนนฺติ ฯ อามนฺตา ฯ หญฺจิ วุตฺตํ ภควตา คณโภชนํ ปรมฺปรโภชนํ อติริตฺตโภชนํ อนติริตฺตโภชนํ เตน วต เร วตฺตพฺเพ สงฺโฆ ภุญฺชติ ปิวติ ขาทติ สายตีติ ฯ

[๑๗๒๐] น วตฺตพฺพํ สงฺโฆ ภุญฺชติ ปิวติ ขาทติ สายตีติ ฯ อามนฺตา ฯ นนุ อฏฺฐ ปานานิ วุตฺตานิ ภควตา อมฺพปานํ ชมฺพุปานํ โจจปานํ โมจปานํ มธุปานํ มุทฺทิกปานํ สาลุกปานํ ผารุสกปานนฺติ ฯ อามนฺตา ฯ หญฺจิ อฏฺฐ ปานานิ วุตฺตานิ ภควตา อมฺพปานํ ชมฺพุปานํ โจจปานํ โมจปานํ มธุปานํ มุทฺทิกปานํ สาลุกปานํ ผารุสกปานํ เตน วต เร วตฺตพฺเพ สงฺโฆ ภุญฺชติ ปิวติ ขาทติ สายตีติ ฯ

[๑๗๒๑] สงฺโฆ ภุญฺชติ ปิวติ ขาทติ สายตีติ ฯ อามนฺตา ฯ มคฺโค ภุญฺชติ ปิวติ ขาทติ สายติ ผลํ ภุญฺชติ ปิวติ ขาทติ สายตีติ ฯ น เหวํ วตฺตพฺเพ ฯเปฯ น วตฺตพฺพํ สงฺโฆ ภุญฺชตีติกถา ฯ __________________ น วตฺตพฺพํ สงฺฆสฺสทินฺนํ มหปฺผลนฺติกถา