อสัญจิจจกถา

20. Vīsatimavagga

1. Asañciccakathāvaṇṇanā

[857-862] Idāni asañciccakathā nāma hoti. Tattha "anantariyavatthūni nāma garūni bhāriyāni, tasmā asañciccāpi tesu vatthūsupi vikopitesu anantariko hotī"ti yesaṃ laddhi seyyathāpi ekaccānaṃ uttarāpathakānaṃ, te sandhāya asañciccāti pucchā sakavādissa, laddhivasena paṭiññā itarassa. Atha naṃ "yasmā anantariyakammaṃ nāma kammapathappattaṃ, yadi ca asañcicca kammapathabhedo siyā, avasesā pāṇātipātādayopi asañcicca bhaveyyun"ti codanatthaṃ asañcicca pāṇaṃ Hantvātiādimāha. Itaro tathārūpāya laddhiyā abhāvena paṭikkhipati. Sesaṃ yathāpālimeva niyyāti. Na vattabbaṃ mātughātakoti pucchā paravādissa, rogatikicchākārādikāle 1- asañcicca ghātaṃ sandhāya paṭiññā sakavādissa. Nanu mātā jīvitā voropitāti pañhepi asañcicca voropitaṃ sandhāya paṭiññā sakavādisseva. Evaṃ adhippāyampana aggahetvā hañcīti laddhipatiṭṭhāpanaṃ itarassa, taṃ ayoniso patiṭṭhāpitattā appatiṭṭhitameva. Pitughātakādīsupi eseva nayo. Saṃghabhedake pana dhammasaññiṃ sandhāya saṃghabhedo anantarikoti pucchā sakavādissa, "saṃghaṃ samaggaṃ bhetvāna, kappaṃ nirayamhi paccatī"ti vacanaṃ ayoniso gahetvā paṭiññā paravādissa. Puna sabbeti puṭṭho sakapakkhe dhammasaññiṃ sandhāya paṭikkhipati, parapakkhe dhammasaññiṃ sandhāya paṭijānāti. Dhammasaññīti pañhadvayepi eseva nayo. Nanu vuttaṃ bhagavatāti suttaṃ ekanteneva dhammavādissa anantarikabhāva- dassanatthaṃ vuttaṃ. Āpāyiko nerayikoti gāthāyapi adhammavādīyeva adhippeto. Itaro pana adhippāyaṃ aggahetvā laddhiṃ patiṭṭhāpeti. Sā ayoniso patiṭṭhāpitattā appatiṭṭhitāyevāti.

Asañciccakathāvaṇṇanā niṭṭhitā.