อุปปัตติกถา

Saha upapattiyā arahāti . āmantā . Saha upapattiyā sotāpanno hotīti. Na hevaṃ vattabbe .pe.

Saha upapattiyā arahāti . āmantā . Saha upapattiyā sakadāgāmī hotīti. Na hevaṃ vattabbe .pe.

Saha upapattiyā arahāti . āmantā . Saha upapattiyā anāgāmī hotīti. Na hevaṃ vattabbe .pe.

Saha upapattiyā sotāpanno na hotīti . āmantā. Hañci saha upapattiyā sotāpanno na hoti no vata re vattabbe saha upapattiyā arahāti.

Saha upapattiyā sakadāgāmī na hotīti . āmantā . Hañci saha upapattiyā sakadāgāmī na hoti no vata re vattabbe saha upapattiyā arahāti.

Saha upapattiyā anāgāmī na hotīti . āmantā . Hañci saha upapattiyā anāgāmī na hoti no vata re vattabbe saha upapattiyā arahāti.

Saha upapattiyā arahāti . āmantā . sārīputto thero saha upapattiyā arahāti . na hevaṃ vattabbe .pe. Mahāmoggallāno thero .pe. mahākassapo thero .pe. Mahākaccāyano thero .pe. mahākoṭṭhiko thero .pe. mahāpaṇṭhako thero saha upapattiyā arahāti. Na hevaṃ vattabbe .pe.

Sārīputto thero na saha upapattiyā arahāti . Āmantā . hañci sārīputto thero na saha upapattiyā arahā no vata re vattabbe saha upapattiyā arahāti.

Mahāmoggallāno thero .pe. mahākassapo thero mahākaccāyano thero mahākoṭṭhiko thero .pe.

Mahāpaṇṭhako thero na saha upapattiyā arahāti . Āmantā . hañci mahāpaṇṭhako thero na saha upapattiyā arahā no vata re vattabbe saha upapattiyā arahāti.

Saha upapattiyā arahāti . āmantā . Upapattesiyena cittena arahattaṃ sacchikaroti lokiyena sāsavena .pe. Saṅkilesikenāti. Na hevaṃ vattabbe .pe.

Saha upapattiyā arahāti . āmantā . upapattesiyaṃ cittaṃ niyyānikaṃ khayagāmi bodhagāmi apacayagāmi anāsavaṃ .pe. Asaṅkilesikanti. Na hevaṃ vattabbe .pe.

Nanu upapattesiyaṃ cittaṃ aniyyānikaṃ na khayagāmi na bodhagāmi na apacayagāmi sāsavaṃ .pe. saṅkilesikanti . āmantā . Hañci upapattesiyaṃ cittaṃ aniyyānikaṃ na khayagāmi na bodhagāmi na apacayagāmi sāsavaṃ .pe. saṅkilesikaṃ no vata re vattabbe saha upapattiyā arahāti.

Saha upapattiyā arahāti . āmantā . Upapattesiyena cittena rāgaṃ pajahati dosaṃ pajahati mohaṃ pajahati .pe. anottappaṃ pajahatīti. Na hevaṃ vattabbe .pe.

Saha upapattiyā arahāti . āmantā . upapattesiyaṃ cittaṃ maggo .pe. satipaṭṭhānaṃ sammappadhānaṃ iddhipādo indriyaṃ balaṃ .pe. Bojjhaṅgoti. Na hevaṃ vattabbe .pe.

Saha upapattiyā arahāti . āmantā . Upapattesiyena cittena dukkhaṃ parijānāti samudayaṃ pajahati nirodhaṃ sacchikaroti maggaṃ bhāvetīti. Na hevaṃ vattabbe .pe.

Saha upapattiyā arahāti . āmantā . cuticittaṃ maggacittaṃ upapattesiyaṃ cittaṃ phalacittanti. Na hevaṃ vattabbe .pe. Upapattikathā. ----------