การให้นิสสัย

Tena kho pana samayena bhikkhū dasavassamha dasavassamhāti bālā abyattā nissayaṃ denti . dissanti ācariyā bālā antevāsikā paṇḍitā dissanti ācariyā abyattā antevāsikā byattā dissanti ācariyā appassutā antevāsikā bahussutā dissanti ācariyā duppaññā antevāsikā paññavanto . ye te bhikkhū appicchā .pe. te ujjhāyanti khīyanti vipācenti kathaṃ hi nāma bhikkhū dasavassamha dasavassamhāti bālā abyattā nissayaṃ dassanti dissanti ācariyā bālā antevāsikā paṇḍitā dissanti ācariyā abyattā antevāsikā byattā dissanti ācariyā appassutā antevāsikā bahussutā dissanti ācariyā duppaññā antevāsikā paññavantoti . athakho te bhikkhū bhagavato etamatthaṃ ārocesuṃ . saccaṃ kira bhikkhave bhikkhū dasavassamha dasavassamhāti bālā abyattā nissayaṃ denti dissanti ācariyā bālā ... antevāsikā paññavantoti . saccaṃ bhagavāti . vigarahi buddho bhagavā ... vigarahitvā dhammiṃ kathaṃ katvā bhikkhū āmantesi na bhikkhave bālena abyattena nissayo dātabbo yo dadeyya Āpatti dukkaṭassa . anujānāmi bhikkhave byattena bhikkhunā paṭibalena dasavassena vā atirekadasavassena vā nissayaṃ dātunti.

Tena kho pana samayena bhikkhū ācariyupajjhāyesu pakkantesupi vibbhantesupi kālakatesupi pakkhasaṅkantesupi nissayapaṭippassaddhiyo na jānanti . bhagavato etamatthaṃ ārocesuṃ . pañcimā bhikkhave nissayapaṭippassaddhiyo upajjhāyamhā upajjhāyo pakkanto vā hoti vibbhanto vā kālakato vā pakkhasaṅkanto vā āṇattiyeva pañcamī imā kho bhikkhave pañca nissayapaṭippassaddhiyo upajjhāyamhā . Chayimā bhikkhave nissayapaṭippassaddhiyo ācariyamhā ācariyo pakkanto vā hoti vibbhanto vā kālakato vā pakkhasaṅkanto vā āṇattiyeva pañcamī upajjhāyena vā samodhānagato 1- hoti imā kho bhikkhave cha nissayapaṭippassaddhiyo ācariyamhā.