มุจจลินทกถา

อถโข มุจลินฺโท นาคราชาติ ตสฺเสว มุจลินฺทรุกฺขสฺส สมีเป โปกฺขรณิยา นิพฺพตฺโต มหานุภาโว นาคราชา ฯ สตฺตกฺขตฺตุํ โภเคหิ ปริกฺขิปิตฺวาติ เอวํ โภเคหิ ปริกฺขิปิตฺวา อุปริมุทฺธนิ มหนฺตํ ผณํ กริตฺวาว ฐิเต ตสฺมึ ตสฺส ปริกฺเขปพฺภนฺตรํ โลหปาสาเท ภณฺฑาคารคพฺภปฺปมาณํ อโหสิ ตสฺมา ภควา นิวาเต ปิทหิตทฺวาร- วาตปาเน กูฏาคาเร นิสินฺโน วิย ชาโต ฯ มา ภควนฺตํ สีตนฺติอาทิ ตสฺส ตถา กริตฺวา ฐานการณปริทีปนํ ฯ โส หิ มา ภควนฺตํ สีตญฺจ พาธยิตฺถ มา อุณฺหํ มา ฑํสาทิสมฺผสฺโส พาธยิตฺถาติ ตถา กริตฺวา อฏฺฐาสิ ฯ ตตฺถ กิญฺจาปิ สตฺตาหวทฺทลิกาย อุณฺหเมว นตฺถิ สเจ ปน อนฺตรนฺตรา เมโฆ วิคจฺเฉยฺย อุณฺหํ ภเวยฺย ตํปิ นํ มา พาธยิตฺถาติ เอวํ ตสฺส จินฺเตตุํ ยุตฺตํ ฯ วิทฺธนฺติ อุพฺพิทฺธํ เมฆวิคเมน ทูรีภูตนฺติ อตฺโถ ฯ วิคตวลาหกนฺติ อปคตเมฆํ ฯ เทวนฺติ อากาสํ ฯ สกวณฺณนฺติ อตฺตโน รูปํ ฯ สุโข วิเวโกติ นิพฺพานสงฺขาโต อุปธิวิเวโก สุโข ฯ ตุฏฺฐสฺสาติ จตุมคฺคญาณสนฺโตเสน สนฺตุฏฺฐสฺส ฯ สุตธมฺมสฺสาติ ปกาสิตธมฺมสฺส ฯ ปสฺสโตติ ตํ วิเวกํ ยํ วา กิญฺจิ ปสฺสิตพฺพํ นาม ตํ สพฺพํ อตฺตโน วิริยพลาธิคเตน ญาณจกฺขุนา ปสฺสนฺตสฺส ฯ อพฺยาปชฺฌนฺติ อกุปฺปนภาโว ฯ เอเตน เมตฺตาปุพฺพภาโค ทสฺสิโต ฯ ปาณภูเตสุ สํยโมติ สตฺเตสุ จ สํยโม อวิหึสนภาโว สุโขติ อตฺโถ ฯ เอเตน กรุณาปุพฺพภาโค ทสฺสิโต ฯ สุขา วิราคตา โลเกติ วิราคตาปิ สุขา ฯ กีทิสี ฯ กามานํ สมติกฺกโมติ ยา กามานํ สมติกฺกโมติ วุจฺจติ สา วิราคตาปิ สุขาติ อตฺโถ ฯ เอเตน อนาคามิมคฺโค กถิโต ฯ อสฺมิมานสฺส วินโยติ อิมินา ปน อรหตฺตํ กถิตํ ฯ อรหตฺตํ หิ อสฺมิมานสฺส ปสฺสทฺธิวินโยติ วุจฺจติ ฯ อิโต ปรญฺจ สุขํ นาม นตฺถิ ฯ เตนาห เอตํ เว ปรมํ สุขนฺติ ฯ