เรื่องห้ามคนลักเพศและคนเข้ารีดมิให้อุปสมบท

{๑๑๐} ปุราณกุลปุตฺโตติ ปุราณสฺส อนุกฺกเมน ปาริชุญฺญํ ปตฺตสฺส กุลสฺส ปุตฺโต ฯ ขีณโกลญฺโญติ มาติปกฺขปิติปกฺขโต โกลญฺญา ขีณา วินฏฺฐา มตา อสฺสาติ ขีณโกลญฺโญ ฯ อนธิคตนฺติ อปฺปตฺตํ ฯ ผาตึ กาตุนฺติ วฑฺเฒตุํ ฯ อิงฺฆาติ อุยฺโยชนตฺเถ นิปาโต ฯ อนุยุญฺชิยมาโนติ เอกมนฺตํ เนตฺวา เกสมสฺสุ- โอโรปนกาสายปฏิคฺคหณสรณคมนอุปชฺฌายคหณกมฺมวาจนิสฺสยธมฺเม ปุจฺฉิยมาโน ฯ เอตมตฺถํ อาโรเจสีติ เอตํ สยํ ปพฺพชิตภาวํ อาทิโต ปฏฺฐาย อาจิกฺขิ ฯ เถยฺยสํวาสโก ภิกฺขเวติ เอตฺถ ตโย เถยฺยสํวาสกา ลิงฺคตฺเถนโก สํวาสตฺเถนโก อุภยตฺเถนโกติ ฯ ตตฺถ โย สยํ ปพฺพชิตฺวา วิหารํ คนฺตฺวา น ภิกฺขุวสฺสานิ คเณติ น ยถาวุฑฺฒํ วนฺทนํ สาทิยติ น อาสเนน ปฏิพาหติ น อุโปสถ- ปวารณาทีสุ สนฺทิสฺสติ อยํ ลิงฺคมตฺตสฺเสว เถนิตตฺตา ลิงฺคตฺเถนโก นาม ฯ โย ปน ภิกฺขูหิ ปพฺพชิโต สามเณโร สมาโน วิเทสํ คนฺตฺวา อหํ ทสวสฺโส วา วีสติวสฺโส วาติ มุสา วตฺวา ภิกฺขุวสฺสานิ คเณติ ยถาวุฑฺฒํ วนฺทนํ สาทิยติ อาสเนน ปฏิพาหติ อุโปสถปวารณาทีสุ สนฺทิสฺสติ อยํ สํวาสมตฺตสฺเสว เถนิตตฺตา สํวาสตฺเถนโก นาม ฯ ภิกฺขุวสฺสคณนาทิโก หิ สพฺโพปิ กิริยเภโท อิมสฺมึ เอตฺถ สํวาโสติ เวทิตพฺโพ ฯ สิกฺขํ ปจฺจกฺขาย น เม โกจิ ชานาตีติ เอวํ ปฏิปชฺชนฺเตปิ เอเสว นโย ฯ โย ปน สยํ ปพฺพชิตฺวา วิหารํ คนฺตฺวา ภิกฺขุวสฺสานิ คเณติ ยถาวุฑฺฒํ วนฺทนํ สาทิยติ อาสเนน ปฏิพาหติ อุโปสถปวารณาทีสุ สนฺทิสฺสติ อยํ ลิงฺคสฺส เจว สํวาสสฺส จ เถนิตตฺตา อุภยตฺ- เถนโก นาม ฯ อยํ ติวิโธปิ เถยฺยสํวาสโก อนุปสมฺปนฺโน น อุปสมฺปาเทตพฺโพ อุปสมฺปนฺโน นาเสตพฺโพ ปุน ปพฺพชฺชํ ยาจนฺโตปิ น ปพฺพาเชตพฺโพ ฯ เอตฺถ จ อสมฺโมหตฺถํ อิทํ ปกิณฺณกํ เวทิตพฺพํ

ราชทุพฺภิกฺขกนฺตาร- โรคเวริภเยน วา

จีวราหรณตฺถํ วา ลิงฺคํ อาทิยตีธ โย

สํวาสํ นาธิวาเสติ ยาว โส สุทฺธมานโส

เถยฺยสํวาสโก นาม ตาว เอส น วุจฺจตีติ ฯ

ตตฺร วิตฺถารนโย อิเธกจฺจสฺส ราชา กุทฺโธ โหติ ฯ โส เอวํ เม โสตฺถิ ภวิสฺสตีติ สยเมว ลิงฺคํ คเหตฺวา ปลายติ ฯ ตํ ทิสฺวา รญฺโญ อาโรเจนฺติ ฯ ราชา สเจ ปพฺพชิโต น ตํ ลพฺภา กิญฺจิ กาตุนฺติ ตสฺมึ โกธํ ปฏิวิเนติ ฯ โส วูปสนฺตํ เม ราชภยนฺติ สงฺฆมชฺฌํ อโนสริตฺวาว คิหิลิงฺคํ คเหตฺวา อาคโต ปพฺพาเชตพฺโพ ฯ อถาปิ สาสนํ นิสฺสาย มยา ชีวิตํ ลทฺธํ หนฺททานิ อหํ ปพฺพชามีติ อุปฺปนฺนสํเวโค เตเนว ลิงฺเคน อาคนฺตฺวา อาคนฺตุกวตฺตํ น สาทิยติ ภิกฺขูหิ ปุฏฺโฐ วา อปุฏฺโฐ วา ยถาภูตมตฺตานํ อาวิกตฺวา ปพฺพชฺชํ ยาจติ ลิงฺคํ อปเนตฺวา ปพฺพาเชตพฺโพ ฯ สเจ ปน วตฺตํ สาทิยติ ปพฺพชิตาลยํ ทสฺเสติ สพฺพํ ปุพฺเพ วุตฺตํ วสฺสคณนาทิเภทํ วิธึ ปฏิปชฺชติ อยํ น ปพฺพาเชตพฺโพ ฯ

อิธ ปเนกจฺโจ ทุพฺภิกฺเข ชีวิตุํ อสกฺโกนฺโต สยเมว ลิงฺคํ คเหตฺวา สพฺพปาสณฺฑิยภตฺตานิ ภุญฺชนฺโต ทุพฺภิกฺเข วีติวตฺเต สงฺฆมชฺฌํ อโนสริตฺวาว คิหิลิงฺคํ คเหตฺวา อาคโตติ สพฺพํ ปุริมสทิสเมว ฯ อปโร มหากนฺตารํ นิตฺถริตุกาโม โหติ สตฺถวาโห จ ปพฺพชิเต คเหตฺวา คจฺฉติ ฯ โส เอวํ มํ สตฺถวาโห คเหตฺวา คมิสฺสตีติ สยเมว ลิงฺคํ คเหตฺวา สตฺถวาเหน สทฺธึ กนฺตารํ นิตฺถริตฺวา เขมนฺตํ ปตฺวา สงฺฆมชฺฌํ อโนสริตฺวาว คิหิลิงฺคํ คเหตฺวา อาคโตติ สพฺพํ ปุริมสทิสเมว ฯ อปโร โรคภเย อุปฺปนฺเน ชีวิตุํ อสกฺโกนฺโต สยเมว ลิงฺคํ คเหตฺวา สพฺพปาสณฺฑิยภตฺตานิ ภุญฺชนฺโต โรคภเย วูปสนฺเต สงฺฆมชฺฌํ อโนสริตฺวาว คิหิลิงฺคํ คเหตฺวา อาคโตติ สพฺพํ ปุริมสทิสเมว ฯ อปรสฺส เอโก เวริโก กุทฺโธ โหติ ฆาเตตุกาโม นํ วิจรติ โส เอวํ เม โสตฺถิ ภวิสฺสตีติ สยเมว ลิงฺคํ คเหตฺวา ปลายติ เวริโก กุหึ โสติ ปริเยสนฺโต ปพฺพชิตฺวา ปลาโตติ สุตฺวา สเจ ปพฺพชิโต น ตํ ลพฺภา กิญฺจิ กาตุนฺติ ตสฺมึ โกธํ ปฏิวิเนติ ฯ โส วูปสนฺตํ เม เวริภยนฺติ สงฺฆมชฺฌํ อโนสริตฺวาว คิหิลิงฺคํ คเหตฺวา อาคโตติ สพฺพํ ปุริมสทิสเมว ฯ อปโร ญาติกุลํ คนฺตฺวา สิกฺขํ ปจฺจกฺขาย คิหี หุตฺวา อิมานิ จีวรานิ อิธ วินสฺสนฺติ สเจปิ อิมานิ คเหตฺวา วิหารํ คมิสฺสามิ อนฺตรามคฺเค มํ โจโรติ คเหสฺสนฺติ ยนฺนูนาหํ กายปริหาริยานิ กตฺวา คจฺเฉยฺยนฺติ จีวราหรณตฺถํ นิวาเสตฺวา จ ปารุปิตฺวา จ วิหารํ คจฺฉติ ฯ ตํ ทูรโต ว อาคจฺฉนฺตํ ทิสฺวา สามเณรา จ ทหรา จ อพฺภุคฺคจฺฉนฺติ วตฺตํ ทสฺเสนฺติ ฯ โส น สาทิยติ ยถาภูตมตฺตานํ อาวิกโรติ ฯ สเจ ภิกฺขู นทานิ มยํ ตํ มุญฺจิสฺสามาติ พลกฺกาเรน ปพฺพาเชตุกามา โหนฺติ กาสายานิ อปเนตฺวา ปุน ปพฺพาเชตพฺโพ ฯ สเจ ปน นยิเม มม หีนายาวตฺตภาวํ ชานนฺตีติ ตํเยว ภิกฺขุภาวํ ปฏิชานิตฺวา สพฺพํ ปุพฺเพ วุตฺตํ วสฺสคณนาทิเภทํ วิธึ ปฏิปชฺชติ อยํ น ปพฺพาเชตพฺโพ ฯ

อปโร มหาสามเณโร ญาติกุลํ คนฺตฺวา อุปฺปพฺพชิตฺวา กมฺมนฺตานุฏฺฐาเนน อุพฺพาโฬฺห หุตฺวา ปุนทานิ อหํ สมโณว ภวิสฺสามิ เถโรปิ เม อุปฺปพฺพชิตภาวํ น ชานาตีติ ตเทว ปตฺตจีวรํ อาทาย วิหารํ คจฺฉติ ตมตฺถํ ภิกฺขูนํ นาโรเจติ สามเณรภาวํ ปฏิชานาติ ฯ อยํ เถยฺยสํวาสโกเยว ปพฺพชฺชํ น ลภติ ฯ สเจปิสฺส ลิงฺคคหณกาเล เอวํ โหติ นาหํ กสฺสจิ อาโรเจสฺสามีติ วิหารญฺจ คโต อาโรเจติ ฯ คหเณเนว เถยฺยสํวาสโก ฯ อถาปิสฺส คหณกาเล อาจิกฺขิสฺสามีติ จิตฺตํ อุปฺปนฺนํ โหติ วิหารญฺจ คนฺตฺวา กุหึ ตฺวํ อาวุโส คโตติ วุตฺโต นทานิ มํ อิเม ชานนฺตีติ วญฺเจตฺวา นาจิกฺขติ ฯ นาจิกฺขิสฺสามีติ สห ธุรนิกฺเขเปน อยมฺปิ เถยฺยสํวาสโกว ฯ สเจ ปนสฺส คหณกาเลปิ อาจิกฺขิสฺสามีติ จิตฺตํ อุปฺปนฺนํ โหติ วิหารํ คนฺตฺวาปิ อาจิกฺขติ อยํ ปุน ปพฺพชฺชํ ลภติ ฯ อปโร ทหรสามเณโร มหนฺโต วา ปน พาโล อพฺยตฺโต โส ปุริมนเยเนว อุปฺปพฺพชิตฺวา ฆเร วจฺฉกรกฺขณาทีนิ กาตุํ น อิจฺฉติ ฯ ตเมนํ ญาตกา ตานิเยว กาสายานิ อจฺฉาเทตฺวา ถาลกํ วา ปตฺตํ วา หตฺเถ ทตฺวา คจฺฉ สมโณว โหหีติ ฆรา นีหรนฺติ ฯ โส วิหารํ คจฺฉติ ฯ เนว นํ ภิกฺขู ชานนฺติ อยํ อุปฺปพฺพชิตฺวา ปุน สยเมว ปพฺพชิโตติ ฯ นาปิ สยํ ชานาติ โย เอวํ ปพฺพชติ โส เถยฺยสํวาสโก นาม โหตีติ ฯ สเจ ตํ ปริปุณฺณวีสติวสฺสํ อุปสมฺปาเทนฺติ สูปสมฺปนฺโน ฯ สเจ ปน อนุปสมฺปนฺนกาเลเยว วินยวินิจฺฉเย วตฺตมาเน สุณาติ โย เอวํ ปพฺพชติ โส เถยฺยสํวาสโก นาม โหตีติ เตน มยา เอวํ กตนฺติ ภิกฺขูนํ อาจิกฺขิตพฺพํ ฯ เอวํ ปุน ปพฺพชฺชํ ลภติ ฯ สเจ นทานิ มํ โกจิ ชานาตีติ น อาโรเจติ ธุเร นิกฺขิตฺตมตฺเต เถยฺยสํวาสโก ฯ ภิกฺขุ สิกฺขํ ปจฺจกฺขาย ลิงฺคํ อปเนตฺวา ทุสฺสีลกมฺมํ กตฺวา วา อกตฺวา วา ปุน สพฺพํ ปุพฺเพ วุตฺตํ วสฺสคณนาทิเภทํ วิธึ ปฏิปชฺชติ เถยฺยสํวาสโก โหติ ฯ สิกฺขํ อปฺปจฺจกฺขาย สลิงฺเค ฐิโต เมถุนํ ปฏิเสวิตฺวา วสฺสคณนาทิเภทํ วิธึ อาปชฺชนฺโต เถยฺยสํวาสโก น โหติ ปพฺพชฺชามตฺตํ ลภติ ฯ อนฺธกฏฺฐกถายมฺปน เอโส เถยฺยสํวาสโกติ วุตฺตํ ฯ ตํ น คเหตพฺพํ ฯ

เอโก ภิกฺขุ กาสาเย สอุสฺสาโหว โอทาตํ นิวาเสตฺวา เมถุนํ ปฏิเสวิตฺวา ปุน กาสายานิ นิวาเสตฺวา วสฺสคณนาทิเภทํ สพฺพํ วิธึ อาปชฺชติ อยมฺปิ เถยฺยสํวาสโก น โหติ ปพฺพชฺชามตฺตํ ลภติ ฯ สเจ ปน กาสาเย ธุรํ นิกฺขิปิตฺวา โอทาตํ นิวาเสตฺวา เมถุนํ ปฏิเสวิตฺวา ปุน กาสายานิ นิวาเสตฺวา วสฺสคณนาทิเภทํ สพฺพํ วิธึ อาปชฺชติ เถยฺยสํวาสโก โหติ ฯ สามเณโร สลิงฺเค ฐิโต เมถุนาทึ อสฺสมณกรณธมฺมํ อาปชฺชิตฺวาปิ เถยฺย- สํวาสโก น โหติ ฯ สเจปิ กาสาเย สอุสฺสาโหว กาสายานิ อปเนตฺวา เมถุนํ ปฏิเสวิตฺวา ปุน กาสายานิ นิวาเสติ เนว เถยฺยสํวาสโก โหติ ฯ สเจ ปน กาสาเย ธุรํ นิกฺขิปิตฺวา นคฺโค วา โอทาตนิวตฺโถ วา เมถุนเสวนาทีหิ อสฺสมโณ หุตฺวา กาสายานิ นิวาเสติ เถยฺยสํวาสโก โหติ ฯ สเจ คิหิภาวํ ปตฺถยมาโน กาสายํ โอวฏฺฏิกํ วา กตฺวา อญฺเญน วา อากาเรน คิหินิวาสเนน นิวาเสติ โสภติ นุโข เม คิหิลิงฺคํ น โสภตีติ วีมํสนตฺถํ รกฺขติ ตาว โสภตีติ สมฺปฏิจฺฉิตฺวา ปน ปุน ลิงฺคํ สาทิยนฺโต เถยฺยสํวาสโก โหติ ฯ โอทาตํ นิวาเสตฺวา วีมํสนสมฺปฏิจฺฉเนสุปิ เอเสว นโย ฯ สเจ ปน นิวตฺถกาสายสฺส อุปริ โอทาตํ นิวาเสตฺวา วีมํสติ วา สมฺปฏิจฺฉติ วา รกฺขติเยว ฯ ภิกฺขุนิยาปิ เอเสว นโย ฯ สาปิ คิหิภาวํ ปตฺถยมานา สเจ กาสายํ คิหินิวาสนํ นิวาเสติ โสภติ นุโข เม คิหิลิงฺคํ น โสภตีติ วีมํสนตฺถํ รกฺขติ ตาว สเจ โสภตีติ สมฺปฏิจฺฉติ น รกฺขติ ฯ โอทาตํ นิวาเสตฺวา วีมํสนสมฺปฏิจฺฉเนสุ เอเสว นโย ฯ นิวตฺถกาสายสฺส ปน อุปริ โอทาตํ นิวาเสตฺวา วีมํสตุ วา สมฺปฏิจฺฉตุ วา รกฺขติเยว ฯ สเจ โกจิ วุฑฺฒปพฺพชิโต วสฺสานิ อคเณตฺวา ปาลิยมฺปิ อฐตฺวา เอกปสฺเสนาคนฺตฺวา มหาเปฬาทีสุ กฏจฺฉุนา อุกฺขิตฺเต ภตฺตปิณฺเฑ ปตฺตํ อุปนาเมตฺวา เสโน วิย มํสเปสึ คเหตฺวา คจฺฉติ เถยฺยสํวาสโก น โหติ ฯ ภิกฺขุวสฺสานิ ปน คเณตฺวา คณฺหนฺโต เถยฺยสํวาสโก โหติ ฯ สยํ สามเณโรว สามเณรปฏิปาฏิยา กูฏวสฺสานิ คเณตฺวา คณฺหนฺโต เถยฺยสํวาสโก น โหติ ฯ ภิกฺขุ ภิกฺขุปฏิปาฏิยา กูฏวสฺสานิ คเณตฺวา คณฺหนฺโต ภณฺฑคฺเฆน กาเรตพฺโพติ ฯ

เถยฺยสํวาสกกถา นิฏฺฐิตา ฯ

ติตฺถิยปกฺกนฺตโก ภิกฺขเวติ เอตฺถ ปน ติตฺถิเยสุ ปกฺกนฺโต ปวิฏฺโฐติ ติตฺถิยปกฺกนฺตโก ฯ โส น เกวลํ อุปสมฺปาเทตพฺโพ อถโข น ปพฺพาเชตพฺโพติ ฯ ตตฺรายํ วินิจฺฉโย อุปสมฺปนฺโน ภิกฺขุ ติตฺถิโย ภวิสฺสามีติ สลิงฺเคเนว เตสํ อุปสฺสยํ คจฺฉติ ปทวาเร ปทวาเร ทุกฺกฏํ เตสํ ลิงฺเค อาทินฺนมตฺเต ติตฺถิยปกฺกนฺตโก โหติ ฯ โยปิ สยเมว ติตฺถิโย ภวิสฺสามีติ กุสจีราทีนิ นิวาเสติ ติตฺถิยปกฺกนฺตโก โหติเยว ฯ โย ปน นคฺโค นหายนฺโต อตฺตานํ โอโลเกตฺวา โสภติ เม อาชีวกภาโว อาชีวโก ภวิสฺสนฺติ กาสายานิ อนาทาย นคฺโคว อาชีวกานํ อุปสฺสยํ คจฺฉติ ปทวาเร ปทวาเร ทุกฺกฏํ สเจ ปนสฺส อนฺตรามคฺเค หิโรตฺตปฺปํ อุปฺปชฺชติ ทุกฺกฏานิ เทเสตฺวา มุจฺจติ ฯ เตสํ อุปสฺสยํ คนฺตฺวาปิ เตหิ วา โอวทิโต อตฺตนา วา อิเมสํ ปพฺพชฺชา อติทุกฺขาติ ทิสฺวา นิวตฺตนฺโตปิ มุจฺจติเยว ฯ สเจ ปน กึ ตุมฺหากํ ปพฺพชฺชาย อุกฺกฏฺฐนฺติ ปุจฺฉิตฺวา เกสมสฺสุลุญฺจนาทีติ วุตฺโต เอกเกสมฺปิ ลุญฺจาเปติ อุกฺกุฏิกปฺปธานาทีนิ วา วตานิ อาทิยติ โมรปิญฺฉาทีนิ วา นิวาเสติ เตสํ ลิงฺคํ คณฺหาติ อยํ ปพฺพชฺชา เสฏฺฐาติ เสฏฺฐภาวํ อุปคจฺฉติ น มุจฺจติ ติตฺถิยปกฺกนฺตโก โหติ ฯ สเจ ปน โสภติ นุโข เม ติตฺถิยปพฺพชฺชา น นุโข โสภตีติ วีมํสนตฺถํ กุสจีราทีนิ นิวาเสติ ชฏํ วา พนฺธติ ขาริกาชํ วา อาทิยติ ยาว น สมฺปฏิจฺฉติ ตาว นํ ลทฺธิ รกฺขติ สมฺปฏิจฺฉิตมตฺเต ติตฺถิยปกฺกนฺตโก โหติ ฯ อจฺฉินฺนจีวโร ปน กุสจีราทีนิ นิวาเสนฺโต ราชภยาทีหิ วา ติตฺถิยลิงฺคํ คณฺหนฺโต ลทฺธิยา อภาเวน เนว ติตฺถิยปกฺกนฺตโก โหติ ฯ อยญฺจ ติตฺถิย- ปกฺกนฺตโก นาม อุปสมฺปนฺนภิกฺขุนา กถิโต ตสฺมา สามเณโร สลิงฺเคน ติตฺถายตนํ คโตปิ ปุน ปพฺพชฺชญฺจ อุปสมฺปทญฺจ ลภตีติ กุรุนฺทิยํ วุตฺตํ ฯ ปุริโม ปน เถยฺยสํวาสโก อนุปสมฺปนฺเนน กถิโต ตสฺมา อุปสมฺปนฺโน กูฏวสฺสํ คเณนฺโตปิ อสฺสมโณ น โหติ ฯ ลิงฺเค สอุสฺสาโห ปาราชิกํ อาปชฺชิตฺวา ภิกฺขุวสฺสาทีนิ คเณนฺโตปิ เถยฺยสํวาสโก น โหตีติ ฯ

ติตฺถิยปกฺกนฺตกถา นิฏฺฐิตา ฯ