เรื่องภิกษุหลายรูป

Vassūpanāyikakkhandhakavaṇṇanā

{184} vassūpanāyikakkhandhake appaññattoti ananuññāto asaṃvihito vā. Tedha bhikkhūti te bhikkhū idhasaddo nipātamatto. Sakuntakāti sakuṇā. Saṅkāsayissantīti appossukkā nibaddhavāsaṃ vasissanti. Saṅghātaṃ āpādentāti vināsaṃ āpādentā. Vassāne vassaṃ upagantunti vassāne temāsaṃ vassaṃ upagantunti attho. Kati nukho vassūpanāyikāti kati nukho vassupagamanā. Aparajjugatāya asāḷhiyāti ettha aparajju gatāya assāti aparajjugatā tassā aparajju- gatāya atikkantāya aparasmiṃ divaseti attho. Dutiyanayepi māso gatāya assāti māsagatā tassā māsagatāya atikkantāya māse paripuṇṇeti attho. Tasmā āsāḷhipuṇṇamāya anantare pāṭipadadivase āsāḷhipuṇṇamito vā aparāya puṇṇamāya anantare pāṭipadadivaseyeva vihāraṃ paṭijaggitvā pānīyaṃ paribhojanīyaṃ upaṭṭhapetvā sabbaṃ cetiyavandanādisāmīcikammaṃ niṭṭhapetvā imasmiṃ vihāre imaṃ temāsaṃ vassaṃ upemīti sakiṃ vā dvikkhattuṃ vā vācaṃ nicchāretvā vassaṃ upagantabbaṃ. {185-186} Yo pakkameyyāti ettha anapekkhagamanena vā aññattha aruṇaṃ uṭṭhāpanena vā āpatti veditabbā. Yo atikkameyyāti ettha vihāragaṇanāya āpattiyo veditabbā. Sace hi taṃ divasaṃ vihārasatassa upacāraṃ okkamitvā atikkamati sataṃ āpattiyo. Sace pana vihārūpacāraṃ atikkamitvā aññassa vihārassa upacāraṃ anokkamitvāva nivattati ekāyeva āpatti. Kena antarāyena purimikaṃ anupagatena pacchimikā upagantabbā.

Vassaṃ ukkaḍḍhitukāmoti vassaṃ nāma paṭhamamāsaṃ ukkaḍḍhitukāmo sāvanamāsaṃ akatvā puna āsādhameva kattukāmoti attho. Āgame juṇheti āgame māseti adhippāyo. Anujānāmi bhikkhave rājūnaṃ anuvattitunti ettha vassukkaḍḍhane bhikkhūnaṃ kāci parihāni nāma natthīti anuvattituṃ anuññātaṃ. Tasmā aññasmiṃ ca dhammike kamme anuvattitabbaṃ adhammike pana na kassaci anuvattitabbanti.