เอสาหํ ภนฺเตติ เอตฺถ ปน กิญฺจาปิ มคฺคปฏิเวเธเนวสฺส สิทฺธํ สรณคมนํ ตตฺถ ปน นิจฺฉยคมนเมว คโต อิทานิ วาจาย อตฺตสนฺนิยาตนํ กโรติ มคฺควเสเนวายํ นิยตํ สรณคมนํ ปตฺโต ตํ ปเรสํ วาจาย ปาฏกํ กโรนฺโต ปณิปาตคมนญฺจ คจฺฉนฺโต เอวํ วทติ ฯ

{๕๘} สิงฺคินิกฺขสุวณฺโณติ สิงฺคิสุวณฺณนิกฺเขน สมานวณฺโณ ฯ ทสวาโสติ ทสสุ อริยวาเสสุ วุตฺถวาโส ฯ ทสธมฺมวิทูติ ทสกมฺมปถวิทู ฯ ทสภิ จุเปโตติ ทสหิ อเสเขหิ องฺเคหิ อุเปโต ฯ สพฺพธิ ทนฺโตติ สพฺเพสุ อินฺทฺริเยสุ ทนฺตา ภควโต หิ จกฺขุอาทีนํ กิญฺจิ อทนฺตํ นาม นตฺถิ ฯ

{๕๙} ภควนฺตํ ภุตฺตาวึ โอนีตปตฺตปาณึ เอกมนฺตํ นิสีทีติ ภควนฺตํ ภุตฺตวนฺตํ ปตฺตโต จ อปนีตปาณึ สลฺลกฺเขตฺวา เอกสฺมึ ปเทเส นิสีทีติ อตฺโถ ฯ อตฺถิกานนฺติ พุทฺธาภิคมเนน จ ธมฺมสฺสวเนน จ อตฺถิกานํ ฯ อภิกฺกมนียนฺติ อภิคนฺตุํ สกฺกุเณยฺยํ ฯ อปฺปกิณฺณนฺติ อนากิณฺณํ ฯ อปฺปสทฺทนฺติ วจนสทฺเทน อปฺปสทฺทํ ฯ อปฺปนิคฺโฆสนฺติ นครนิคฺโฆสสทฺเทน อปฺปนิคฺโฆสํ ฯ วิชนวาตนฺติ อนุสญฺจรณชนสฺส สรีรวาเตน วิรหิตํ ฯ วิชนวาทนฺติปิ ปาโฐ ฯ อนฺโตปิ ชนวาเทน รหิตนฺติ อตฺโถ ฯ วิชนปาตนฺติปิ ปาโฐ ฯ ชนสญฺจารวิรหิตนฺติ อตฺโถ ฯ มนุสฺสราหเสยฺยกนฺติ มนุสฺสานํ รหสฺสกิริยฏฺฐานิยํ ฯ ปฏิสลฺลานสารูปนฺติ วิเวกานุรูปํ ฯ