{57} Assāsakāti āsiṃsanā patthanāti attho.

Esāhaṃ bhanteti ettha pana kiñcāpi maggapaṭivedhenevassa siddhaṃ saraṇagamanaṃ tattha pana nicchayagamanameva gato idāni vācāya attasanniyātanaṃ karoti maggavasenevāyaṃ niyataṃ saraṇagamanaṃ patto taṃ paresaṃ vācāya pāṭakaṃ karonto paṇipātagamanañca gacchanto evaṃ vadati.

{58} Siṅginikkhasuvaṇṇoti siṅgisuvaṇṇanikkhena samānavaṇṇo. Dasavāsoti dasasu ariyavāsesu vutthavāso. Dasadhammavidūti dasakammapathavidū. Dasabhi cupetoti dasahi asekhehi aṅgehi upeto. Sabbadhi dantoti sabbesu indriyesu dantā bhagavato hi cakkhuādīnaṃ kiñci adantaṃ nāma natthi.

{59} Bhagavantaṃ bhuttāviṃ onītapattapāṇiṃ ekamantaṃ nisīdīti bhagavantaṃ bhuttavantaṃ pattato ca apanītapāṇiṃ sallakkhetvā ekasmiṃ padese nisīdīti attho. Atthikānanti buddhābhigamanena ca dhammassavanena ca atthikānaṃ. Abhikkamanīyanti abhigantuṃ sakkuṇeyyaṃ. Appakiṇṇanti anākiṇṇaṃ. Appasaddanti vacanasaddena appasaddaṃ. Appanigghosanti nagaranigghosasaddena appanigghosaṃ. Vijanavātanti anusañcaraṇajanassa sarīravātena virahitaṃ. Vijanavādantipi pāṭho. Antopi janavādena rahitanti attho. Vijanapātantipi pāṭho. Janasañcāravirahitanti attho. Manussarāhaseyyakanti manussānaṃ rahassakiriyaṭṭhāniyaṃ. Paṭisallānasārūpanti vivekānurūpaṃ.