กุศลธรรม อาศัยกุศลธรรม

4. Nissayavāravaṇṇanā

[329-337] Nissayavāre kusalaṃ dhammaṃ nissāyāti kusalaṃ dhammaṃ paccayaṭṭhena 1- nissayaṃ katvāti attho. Sesamettha paccayavāre vuttanayeneva veditabbaṃ. Avasāne panassa "paccayatthaṃ nāma nissayatthaṃ, nissayatthaṃ nāma paccayatthan"ti idaṃ ubhinnampi etesaṃ vārānaṃ atthato ninnānākaraṇabhāvadassanatthaṃ vuttaṃ. Atthato hi etepi paṭicca sahajātā viya ninnānākaraṇā. Evaṃ santepi aññamaññassa atthaniyamanatthaṃ vuttā. Avijjāpaccayā saṅkhārātiādīsu hi anissāya vattamānaṃ nānākkhaṇikampi "paccayā uppajjatī"ti vuttaṃ. Aññamaññaṃ allīyitvā ṭhitakaṭṭhādīsu ca ekaṃ ekassa nissayapaccayo na hoti, tathā upādārūpaṃ mahābhūtassa nissayapaccayo na hotiyeva. Iti paccayavārena nissayapaccayabhāvaṃ nissayavārena ca paccayāti vuttassa sahajātapurejātabhāvaṃ niyametuṃ ubhopete vuttā. Apica tathā bujjhanakānaṃ ajjhāsayavasena desanāvilāsena niruttipaṭisambhidāppabhedajānanavasena cāpi ete ubhopi vuttāti veditabbāti. 2-

Nissayavāravaṇṇanā niṭṭhitā.

@Footnote: 1 cha.Ma. patiṭṭhaṭṭhena 2 cha.Ma. veditabbātīti pāṭho na dissati